Раст на акциите на „Ново Нордиск“ откако беше повлечена копија на неговите апчиња за слабеење

„Ново Нордиск“ (Novo Nordisk) закрепнува по падот на акциите, благодарение на тоа што компанијата „Химс“ (Hims & Hers) ја повлече копијата на апчињата за слабеење „вегови“ (wegovy). 

Акциите на „Ново“ забележаа значително закрепнување откако компанијата „Химс“ се повлече од продажба на копијата на новите апчиња за губење тежина „вегови“, по заканите од американските власти дека ќе преземат мерки против нелегалните копии. Цената на акциите на „Ново“ порасна за 8,6 отсто на берзата во Копенхаген, што е најголемото зголемување годинава.

„Химс“ во саботата објави дека ќе ја прекине понудата на оваа терапија, само еден ден по објавата на Американската агенција за храна и лекови (ФДА) дека ќе се потрудат да дејствуваат против копиите на лековите за губење тежина. Министерството за здравство и човечки услуги на САД исто така соопшти дека ја упатило „Химс“ до Министерството за правда поради можни прекршувања на федералните закони. Во меѓувреме „Ново“ ги предупреди на правни последици ако продолжат со продажбата на копијата.

Минатата недела акциите на „Ново“ доживеаја два значајни удара. Првиот беше поради разочарувачката прогноза за продажбата на компанијата за оваа година, која беше во контраст со прогнозите на ривалот „Ели Лили“ (Eli Lilly & Co). Вториот удар беше веста дека поевтина копија на „вегови“ веќе е достапна на пазарот, што го загрози долгорочниот успех на производот. Акциите на „Химс“ паднаа за 17 отсто пред тргувањето во понеделникот, додека акциите на „Ели Лили“ пораснаа за повеќе од 2 отсто.

Според Грејем Пери, аналитичар во „Сити“, повлекувањето на „Химс“ од пазарот дава „олеснување“ за „Ново“ и може да помогне во ограничувањето на влијанието на инјектираниот „вегови“ во иднина. Сепак, Пери предупредува дека компанијата ќе се соочи со „мноштво предизвици во продажбата и цените во 2026 година и понатаму.“

„Ново“ ја претстави новата таблета „вегови“ како едно од најуспешните лансирања на лекови во последниве години, што е неопходна победа за данската компанија, која се надева дека ќе ја врати довербата на инвеститорите. И покрај тоа, натамошната конкуренција со „Ели Лили“, притисокот од администрацијата на претседателот Доналд Трамп и користењето поевтини копии од лековите за губење тежина ја намалуваат маржата на добивка за производителот.

Извршниот директор на „Ново“, Мајк Доустдар, изјави дека компанијата ќе се соочи со „невидени притисоци за цените“ оваа година. Тоа ќе продолжи и во 2027 година, кога се очекува администрацијата на Трамп да најави значајни попусти за популарните лекови на „Ново“, „оземпик“ и „вегови“, кои се продаваат преку програмата Медикер (Medicare) за здравствено осигурување на американските пензионери.