Германската влада би можела да го зголеми својот удел во Унипер на над 50 отсто и е подготвена да го преземе историскиот чекор за целосна национализација на најголемиот увозник на гас во земјата со цел да се спречи колапсот на енергетскиот систем.
Унипер со седиште во Дизелдорф има потреба од дополнителна помош од државата, откако веќе го искористи пакетот за поддршка, вреден дури 20 милијарди евра, велат извори запознаени со ова прашање.
Зголемувањето на цените на природниот гас и намалувањето на снабдувањето со рускиот гас предизвикаа милионски дневни загуби, што ја натера германската влада да подготви спасувачки пакет во јули, кој вклучуваше удел од 30 отсто.
Администрацијата на канцеларот Олаф Шолц е подготвена да внесе повеќе капитал и да го зголеми својот удел над прагот од 50 отсто, изјави еден од изворите, кој сакаше да остане анонимен поради доверливи информации.
Се разговара и за целосна национализација, а фирмата мајка на Унипер, финската компанија Фортум, ќе го има последниот збор за таа одлука, велат тие.
Разговорите со финската влада, мнозинскиот сопственик на Фортум, се во тек, а Германија претходно изјави дека не е подготвена да го купи финскиот удел.
Беате Барон, портпаролка на германското Министерство за економија, одби да коментира, а Унипер не одговори на барањето за коментар.
Од Фортум во соопштението во средата рекоа дека не се донесени никакви одлуки „освен она што беше договорено во пакетот за стабилизација во јули“, но додаваат дека се разгледуваат „алтернативни решенија“.
„Влошеното опкружување и финансиската состојба на Унипер мора да се земат предвид бидејќи Фортум, германската влада и Унипер продолжуваат со дискусиите за долгорочно решение“, велат од финската компанија.
Што вели Bloomberg Intelligence …
„Потенцијалната национализација на „Унипер“ од страна на Германија може да им даде излез на малцинските инвеститори пред неизвесното закрепнување, со загуби поради потребата да се заменат прекинатите испораки на руски гас по тековни цени, кои веројатно ќе надминат 18 милијарди евра оваа година, покажува нашата анализа. "
Германија е решена да обезбеди опстанок на Унипер во наредните месеци, кога енергетската криза би можела да се влоши со намалувањето на температурите кон зимата. Руските ограничувања за снабдување ја принудија компанијата да купува гас на пазарот по повисоки цени за да ги исполни договорите, што ја турка на работ на несолвентност.
Фјучерсите за гас се околу три пати повисоки од пред една година, бидејќи Русија возвраќа на санкциите поради војната во Украина.
VNG AG, подружница на германското претпријатие EnBW AG и уште еден голем увозник на гас, поднесе барање за владина помош минатата недела.
Извршниот директор на Унипер, Клаус-Дитер Маубах, минатата недела во интервју за Блумберг предупреди дека загубите за компензација на рускиот гас може да достигнат седум милијарди евра овој месец, што ќе ја принуди германската влада повторно да интервенира.
Пакетот за стабилизација со владата вклучува бекстоп од седум милијарди евра за осигурување на компанијата до четвртиот квартал, но достигнувањето на таа граница „дефинитивно ќе биде порано“, рече Маубах на маргините на конференцијата во Милано.
.webp){kind=icon}
