„Антропик“ обезбеди 30 милијарди долари нов капитал

„Антропик“ (Anthropic) го финализираше договорот за прибирање 30 милијарди долари од инвеститори, со што вредноста на компанијата е проценета на 380 милијарди долари, вклучително и новиот капитал. Со тоа дополнително се зацврстува позицијата на компанијата за вештачка интелигенција, која сѐ повеќе се приближува до ривалот „Опен еј-ај“ (OpenAI).

Сингапурскиот државен инвестициски фонд „ЏИЦ“ (GIC) и „Коутју“ (Coatue Management) го предводеа договорот, соопшти „Антропик“ во четвртокот. „Д. Е. Шо“ (D.E. Shaw & Co.), „Драгонер“ (Dragoneer Investment Group), „Фаундерс фонд“ (Founders Fund) на Питер Тил, „Ајконик“ (Iconiq) и „МЏ Екс“ (MGX) беа ко-водечки инвеститори во рундата, заедно со учество на низа други инвеститори, меѓу кои „Секвоја“ (Sequoia Capital), „Лајтспид“ (Lightspeed Venture Partners), како и технолошките компании „Енвидија“ (Nvidia Corp.) и „Мајкрософт“ (Microsoft Corp.).

Најновата рунда на финансирање приближно го удвојува претходното вреднување на „Антропик“, со што компанијата станува една од највредните приватни компании во светот. Договорот следи само неколку месеци откако стартапот прибра 13 милијарди долари и доаѓа во исто време кога „Опен еј-ај“ има намера да обезбеди финансирање до 100 милијарди долари, бран активности што ја нагласува силната инвестициска трка за удел во водечките компании за вештачка интелигенција.

„Антропик“ исто така ги потврди плановите да им овозможи на вработените да продаваат акции од компанијата по истото вреднување како во најновата рунда, како што претходно објави Блумберг њуз.

Основана во 2021 година, „Антропик“ се позиционира како компанија фокусирана на безбедноста и одговорниот развој на технологијата. Таа ги насочи своите активности кон профитабилната категорија на корпоративна продажба, во сектори како софтверско инженерство, финансии и здравство. Во последните месеци, стапката на приходите на компанијата нагло порасна, надминувајќи 9 милијарди долари минатата година. Во четвртокот, компанијата соопшти дека таа стапка сега е зголемена на 14 милијарди долари.

„Ова прибирање капитал ја одразува огромната побарувачка што ја гледаме кај овие клиенти и ќе ја искористиме инвестицијата за да продолжиме да ги развиваме производите и моделите наменети за корпоративна употреба, на кои тие веќе се потпираат“, изјави финансискиот директор на „Антропик“, Кришна Рао.

Технологијата на „Антропик“, вклучително и агенти за кодирање што можат да пишуваат и дебагираат софтвер со минимално човечко учество, неодамна ги вознемири глобалните пазари. Тивкото лансирање на алатка за автоматизација на одредени правни работи помогна да дојде до нагло паѓање на акциите на почетокот од месецов. Компанијата неодамна претстави и нов модел на ВИ оптимизиран за автоматизација на корпоративни работни задачи, вклучително и финансиски истражувања, што доведе до пад на акциите на компаниите за финансиски услуги.

Иако бизнисот на „Антропик“ расте брзо, компанијата истовремено троши значителни средства за инфраструктура потребна за развој и поширока примена на ВИ. Претходно соопшти дека ќе потроши 50 милијарди долари за изградба на центри за податоци во САД. Планира и користење специјализирани чипови за ВИ во вредност од десетици милијарди долари од „Алфабет“ (Alphabet Inc.) преку „Гугл“ (Google). Сепак, тие инвестиции се далеку помали во споредба со „Опен еј-ај“, кој се обврза да потроши повеќе од 1,4 билиони долари за инфраструктура за ВИ во наредните години.

За финансирање на тие трошоци, „Антропик“ и „Опен еј-ај“ се потпираа на поддршка од некои од големите производители на чипови и даватели на услуги за облачно пресметување со кои соработуваат, што предизвика загриженост околу циркуларни договори што ја одржуваат индустријата.

„Мајкрософт“ и „Енвидија“ претходно соопштија дека заедно ќе инвестираат до 15 милијарди долари во „Антропик“; дел од таа сума е наменет за тековната рунда, соопшти стартапот. „Мајкрософт“ е и еден од најголемите поддржувачи на „Опен еј-ај“, а се очекува „Енвидија“ да инвестира 20 милијарди долари во претстојната рунда на финансирање на „Опен еј-ај“.