text size
Хотелите во најголемите летни туристички центри во Македонија годинава се поскапени за околу 30 отсто, вели претседателот на туристичко-угостителската комора при Сојузот на стопански комори, Аркан Керим.
Во интервју за „Блумберг Адрија“ тој потенцира дека бизнисите од овој сектор имаат голем број проблеми, како раст на трошоците, дефицит од кадар, лоша патна инфраструктура и недоволна поддршка од државата.
„Знаете како, ние, туристичките работници, сме како магионичари. Работиме во многу тешки услови. Најтешка фела, најтешко нешто стана да се работи во туризмот. Да се излезе од сите овие работи, да се склопат сите коцки не е лесно, тешко е. Немаме никаква поддршка од државата, за жал, имаме многу проблеми. Еве, сега најнов проблем е ова со патот за Охрид, а во Скопје 12 месеци се прави главната артерија на градот. Сите тие работи ние како да не ги гледаме и работиме сè да биде на најдобро можно ниво. Гледаме туристот што ќе дојде да не го почувствува тоа. Но ние знаеме како го правиме тоа, имаме искуство, значи милион проблеми и ситуации сме решавале во минатото и ова ќе го решиме. Но не ни е лесно, бидејќи знаете како е, туристите бараат сите услови да бидат на највисоко ниво, ние се мачиме да им го обезбедиме тоа или гледаме на некој начин да не го видат тоа што не треба да го видат. На некој 'магионичарски' начин успеваме и се надевам дека оваа туристичка сезона ќе ја поминеме во најдобар можен ред, но, верувајте, не е лесно“, вели Керим.
Иако очекува успешна летна туристичка сезона, Керим истакнува дека Владата мора да има слух за проблемите на овој сектор, со цел развој и искористување на потенцијалите на туризмот како двигател на економијата.
„Пред сè ни треба промоција. Пред десет години стигнавме во Њујорк да се промовираме како туристичка држава, а сега најдалеку каде што може да стигнеме се Лесковац и Ниш. Срамота е... Немаме ни помош за вработувања. Дадовме идеја пред една година да се направи либерализација на пазарот и внесување странски кадри, со цел полесно да дојдеме до вработени, бидејќи сведоци сме дека Хрватска ни ги зема во најголем број сите туристички работници за оваа летна сезона. Ние сами не можеме да го правиме тоа ако немаме поддршка од државата“, вели Керим.
.webp){kind=icon}
