text size
Новото зголемување на каматната стапка неповолно ќе влијае на стопанството, ќе ги намали инвестициите и ќе го загрози економскиот раст, вели во интервју за „Блумберг Адрија“ универзитетскиот професор Абил Бауш.
Според него, ефектите од агресивната монетарна политика најмногу ќе се рефлектираат во првиот квартал во 2024 година.
„За разлика од ФЕД и ЕЦБ, каде што по пандемијата имаше поголем проток на пари и со растот на каматите се обидуваат да ги повлечат свежите пари во оптек за некако да влијаат на инфлацијата, која кај нив е веќе едноцифрена, кај нас ситуацијата е друга. Новото зголемување на каматната стапка од Народната банка на 6 отсто ни навестува дека сите оние макроекономски политики на централната власт што би требало да дадат резултати за во овој квартал да може да имаме веќе стабилна едноцифрена инфлација, за жал не ги дадоа ефектите. И во овој момент кога имаме намалување на цените на енергентите за разлика од лани, инфлацијата е намалена, но тоа можеби доаѓа од тој аспект, а не од потезите или политиките што ги води централната банка. И ова загрижува многу, затоа што нашата и така кревка економска стабилност во државата ќе мора да се затегне со нови инвестиции или нови пари на пазарот, што значи дека ќе имаме намален економски раст, а тоа не ме загрижува само за оваа година, туку овој тренд може да продолжи и во наредните години“, вели Бауш.
Бауш додава и дека во обидот да се скроти инфлаторниот притисок се потфрли и со владините политики.
„И на долгорочен план треба да се инвестира во сите сектори и како држава треба да поставиме стратегиски цели за инвестиции, за да немаме толкав удар од светските кризи. Каде потфрламе – потфрливме со макроекономските политики како ограничување на маржите и замрзнатите цени, не направивме добра административна платформа за одредени наши производи за да може да ја задржиме конкурентноста на нашиот пазар како што го прават тоа соседните држави. И се плашам дека токму тој конкурентски однос и претприемачки дух ние ги губиме од ден на ден, а тоа многу лошо ќе се одрази на економијата“, вели Буаш.
.webp){kind=icon}
