Граѓанската обврзница ќе ги зголеми каматите на штедните влогови

Граѓанската обврзница ќе ја збогати понудата на пазарот на капитал во Македонија, вели во интервју за „Блумберг Адрија“ Горан Мојаноски, проектен менаџер во „Аксапта мастерс“.

„Таа всушност не само што ќе го збогати пазарот на капитал со понуда на нов финансиски инструмент туку и ќе придонесе да влијае на банките да ги покачат каматните стапки на штедните влогови“, појаснува Мојаноски.

Тој очекува дека Министерството за финансии ќе излезе за брзо време со очекуваната висина што сака да ја собере во средства од граѓаните. Оваа граѓанска обврзница, според најавите, ќе биде користена за развојни цели.

„Во јавноста ни е познато дека голем број граѓани знаат да штедат и надвор од банките. Верувам дека оваа граѓанска обврзница всушност ќе придонесе тие штедни влогови односно заштеди што ги поседуваат граѓаните надвор од банките да ги оплодат во еден инструмент што ќе има позитивно влијание врз нивниот принос. Од друга страна, ќе има позитивно влијание за државата во собирање и диверзифицирање на јавниот долг со различни инструменти“, вели Мојаноски.

Министерството за финансии веќе има објавено два нови предлог-закона, Закон за проспект и обврски за транспарентност на издавачите на хартии од вредност и Закон за финансиски инструменти, што во целост ќе го заменат Законот за хартии од вредност.

„Овие два закона имаат целосно имплементирани европски правила, што значи дека нашиот пазар на капитал ќе биде усогласен со правила на ЕУ“, вели Мојаноски.

Тој додава дека кога законите ќе се усвојат и ќе стапат во сила тоа ќе значи дека тргувањето што им е познато на инвеститорите во соседните земји, како Хрватска и Словенија, ќе биде под исти правила и на македонскиот пазар на капитал.

„Тоа, пак, значи дека може да придонесе за поголем интерес на странските инвеститори, но и за поширок опсег на воведување нови инструменти, односно македонскиот пазар на капитал да не биде сведен само на обврзници и акции, но исто така ќе може да придонесе кон создавање унија на пазари на капитал, било да е тоа регионална или на ниво на Европа“, додава Мојаноски.

Новите предлог-закони треба да го зголемат и обемот на транспарентност на институциите што се клучни во пазарот на капитал, што, пак, ќе придонесе инвеститорите да бидат поинформирани при носењето на одлуките.