На берзата ХУПЕКС (HUPX) во Унгарија во петокот, на 27 октомври, просечната цена на еден мегават-час електрична енергија изнесуваше 122,14 евра, додека на Македонската берза за електрична енергија цената е 119,38 евра. Цените во изминатиот период се движат во тој просек.
Македонската берза на струја функционира веќе неколку месеци, а директорот Симон Шутиноски во интервју за „Блумберг Адрија“ посочува дека засега има доволно количества на енергија што се тргуваат.
„Волуменот на самата берза на електрична енергија во Македонија постепено расте, што е добар сигнал за една млада берза на електрична енергија, особено во регион како нашиот“, вели Шутиноски.
Цените се како и трендовите во регионот и во Европа.
„За почеток воведовме тргување за ден однапред, на самиот почеток го имаме само тој сегмент на тргување. Цените на овој маркет се движат околу 100-105 евра во изминатиот период, во просек како некоја максимална цена“, вели Шутиноски.
На берзата ХУПЕКС во текот на вчерашниот ден имало највисока цена, која стигнала до 170 евра. „Минималните цени се секако оние од 40 до 50 евра“, вели Шутиноски.
Сепак, она што се случува во овој период и на берзите во Европа е тоа дека дневните цени на електрична енергија беа пониски отколку ноќните цени на електрична енергија.
„Сето тоа е поради појавата на сè повеќе фотоволтаици и произведена електрична енергија од обновливи извори на енергија што работат во текот на денот, така што во текот на денот добивавме пониски цени поради напливот на произведена енергија од фотоволтаиците“, вели Шутиноски.
Тој посочува дека сега таа состојба полека се менува и има некоја стандардна состојба. Но, сепак, временските услови во регионот и во Европа се невпечатливи за овој период со сè уште долги сончеви денови, поради што сè уште се очекува цените во текот на денот да бидат пониски од оние во ноќните часови.
Шутиноски вели дека веќе се работи на сите сегменти што треба да значат регионално поврзување на Македонската берза за струја со берзите од регионот, а исто така се работи и на издавање зелени сертификати за тргување на берзата.