.webp){kind=icon}
Високите цени го скратија времето на поврат на средствата од инвестициите во фотоволтаици. Затоа компаниите не треба да чекаат кога зборуваме за вложување во енергија од обновливи извори, вели во интервју за „Блумберг Адрија“ Зоран Митрески, сопственик на „Ефикс електрикал“.
„Пред да се случи оваа криза, повратот на инвестицијата за правните лица беше од осум до десет години. Денес берзанската цена на електрична енергија е од 90 до 120 евра за мегават-час, што значи дека е повеќе од половина поскапа. Значи, со денешните цени, тој поврат би бил од четири до пет години. Апсурд е ако некој направи добра бизнис-стратегија со која би му се вратила инвестицијата за четири-пет години, тоа да не го направи денес, сега, во овој момент. Овие системи се фантастични за компаниите, кои им даваат можност неколкукратно да ги намалат своите трошоци, а веќе има и доста компании што почнаа да заработуваат на овој начин“, вели тој.
Блумберг Адрија
Иако Македонија има голем потенцијал, сепак Митрески ја потенцира потребата од пообемна енергетска мрежа и системи за складирање на вишокот енергија за поголема употреба на фотоволтаиците.
„Нашите капацитети требаше да бидат искористени многу одамна, но, во принцип, сите претходни влади не ја сфатија сериозно ситуацијата дека за успешна економија е неопходен сопствен енергетски систем. Ние увезуваме 30-40 проценти енергија и кога претходните две години се случи овој енергетски колапс, кога немаше можност ни да се увезува, се направи исчекор во користењето енергија од обновливи извори. Но сега имаме хиперпродукција од енергија со фотоволтаици, која можеби не може да ја издржи енергетската мрежа. За да не се случи колапс на системот, нам ни требаат системи за складирање со систем на батерии или водородни системи“, вели Митрески.
Но и бумот на инвестиции во фотоволтаици што се случи во екот на енергетската криза полека стивнува, со оглед на лошото економско опкружување и сè поскапите пари. Сепак, Митрески вели дека инвестицијата во фотоволтаици секогаш ќе биде добивка за компаниите, затоа што, како што вели, цените на енергијата иако се смирија, нема да се вратат на нивото од пред кризата.
„Претходните неколку години, кога се случи кризата, енергијата беше околу 45-50 евра за мегават-час. Лани достигна речиси до 1.000 евра за мегават-час и не постоеше фирма што не беше заинтересирана да инвестира во такви системи. Во последните неколку месеци цените се стабилизираа, па доста фирми одлучија во овој момент да не инвестираат, можеби чекаат некои подобри времиња, но јас апелирам да не чекаат, бидејќи цените нема да се вратат како порано. Суштината е како да се најде таа енергија, за да не се потпираме само на соларните системи“, вели Митрески.
Што се однесува на регулативите за инвестиции во соларни панели, тој смета дека иако имаше одредени олеснувања, сепак, и тука има можност за натамошни корекции, особено за физичките лица.
„За подобрувањето на енергетската ситуација може да придонесат и физичките лица, за кои на почетокот беа дозволени 3 киловати, па ги зголемија на 4, па на 6 киловати, и за малите потрошувачи до 40 киловати. За малите потрошувачи во овој момент можеби е тоа доволно, но за физичките лица не би рекол, бидејќи инсталирана енергија од 6 киловати и реално добиена енергија во реално време се две различни нешта. Сега на пример влегуваме во зимски период, каде што реално добиената енергија е 10, 20 или 30 отсто во однос на преостанатиот период од пролет, лето и есен. Така што кога луѓето се потпираат на таа енергија за загревање на нивните домови во зимскиот период, ако од тие 6 киловати добиваат 1 или 1,5 киловат, тоа не претставува апсолутно ништо во однос на придонесот за подобрување на семејниот буџет“, вели Митрески.
