Ефектите од климатските промени имаат глобален карактер и ги засегаат сите општествени сфери, вклучувајќи го и бизнисот. „Сепак, голем број компании во Македонија преминот кон построги климатски стандарди го гледаат како ризик и трошок наместо како можност, што е погрешно“, вели во интервју за „Блумберг Адрија“ Горјан Јовановски, директор и коосновач на платформата „EarthCare.ai“, која нуди софтверски решенија и услуги за бизнис-секторот за управување со ризиците од климатските промени.
„Секако дека тоа вклучува финансиски промени во начинот на работење, но тоа не значи дека треба да се гледа само како трошок. Напротив. Иновациите на пример дозволуваат повеќе можности во работата и отвораат нови врати и можности. Ако ова го гледаме исклучиво како трошок, тој трошок ќе станува сè поголем и на крајот навистина ќе ни го преземе бизнисот и ќе станеме непрофитабилни. Мора да бараме начини на иновирање, да креираме позелени практики и да се заштитиме повеќе со користење релевантни податоци“, вели Јовановски.
Тој потенцира дека стопанството не смее да остане имуно на заканите од климатската криза.
„Мислам дека се наоѓаме во рани фази на оваа тема, но компаниите стануваат свесни за заканите од климатските промени. Стопанството мора да разбере дека без конкретни податоци и вклучување на можните ризици од климатските промени не може да планира развој на бизнисот на долг рок. Мора да се знае каков е импактот на бизнисот врз животната средина, но и како истиот тој да се заштити од ефектите од климатската криза. Не може еден субјект да направи целосна промена во светот, тоа мора да биде заеднички напор“, вели Јовановски.
Со него зборувавме и за можностите што ги нуди оваа глобална платформа за бизнис-секторот, за подобро управување со ризиците од климатските промени.
Голема улога во тој процес има и вештачката интелигенција, за која Јовановски вели нуди брза и лесна анализа на податоците за ризиците од климатските промени.
„Таа платформа всушност е еден центар каде што компаниите може да добијат пристап до секакви податоци поврзани со временски прогнози, климатски промени, сериозни невремиња што се случуваат. Зборувам за пожари што се случуваат на отворено, до поплави, невремиња, затрупувања со снег, односно сите оние временски непогоди што можат да ни го попречат работењето на нашите фирми и кои треба да ги вклучиме во планирањето. Овие податоци ние ги преземаме од голем број извори, од сателитски податоци со децении до податоци од радари, државни агенции, мали уреди што луѓе ги поставуваат за да ги следат времето и временските услови. Сите тие ги консолидираме на една визуелна платформа, каде што компании ќе може да дојдат да видат историски тек и историски проблеми што се случувале во одредени клучни региони за нивниот бизнис и да го вклучат сето тоа во планирањето, за нивната иднина да биде многу поспокојна и да знаат каде постојат ризици, а каде не и каде треба да се планира нешто, а каде може да се вложува во други сегменти од нивниот бизнис“, вели Јовановски.