.webp){kind=icon}
Во трговијата на мало и големо минатата година се отвориле најмногу нови компании, покажува анализата на податоците. „Веднаш зад неа е секторот услужни дејности“, вели Бојан Џиков, косопственик на бонитетната агенција „Таргет груп“, во интервју за „Блумберг Адрија“.
„Во согласност со последната обработка на податоците за 2023 година, можеме да кажеме дека трговијата на големо и мало има убедливо најголем пораст, со нешто над 2.000 регистрирани правни субјекти. По неа следува индустријата за други услужни дејности, со 1.002 правни субјекти, а трет на листата е секторот градежништво, со 856 новорегистрирани компании во 2023 година“, вели Џиков.
Бојан Џиков
Bloomberg Adria
Тој посочува дека во согласност со структурата на економијата, ова се многу очекувани резултати и станува збор за релативно актуелни дејности што остваруваат добри резултати за претприемачите.
Според Џиков, ако се гледаат податоците за профитната маржа на компаниите, може да се издвои индустријата за управување со недвижен имот.
„Тука имаме 38,5 отсто профитна маржа и забележуваме раст од 9,5 процентни поени во споредба со претходната година“, вели Џиков.
Тој појаснува дека понатаму следуваат индустријата за вадење руда и камен, со 21,45 отсто профитна маржа, и индустријата образование, со 16,43 отсто профитна маржа, но кај овие две индустрии има незначително намалување на профитабилноста во однос на претходната година, со четири процентни поени.
