Изборниот процес што ни претстои ќе ги намали економската активност и инвестициите. „Дополнително, полабавата фискална политика ќе донесе и ризик од раст на инфлаторните притисоци“, нагласи во интервју за „Блумберг Адрија“ претседателот на Стопанската комора на Северозападна Македонија, Менди Ќура.
„Кај нас, за жал, често имаме избори. Сега имаме и техничка влада, каде што имаме мешан состав на партиите, и тука се можни несогласувања со некој дел од Владата, многу проекти нема да продолжат да се изведуваат итн. За жал, кај нас изборите може да имаат ефект и на тендерите и во делот на донесувањето детални урбанистички планови и многу други нешта. Општеството ни е многу политизирано и администрацијата овие три месеци ќе биде парализирана, што ќе даде негативни ефекти врз стопанството, и во тој дел мислам дека и тоа ќе дејствува на инфлацијата“, вели Ќура.
Како дополнителен ризик од појава на задоцнета инфлација, Ќура ги посочува мерките за замрзнување на цените на дел од производите. Тој смета дека досегашните ефекти од ваквите мерки имаа само негативен ефект и поттикнаа раст на сивата економија.
„Инфлацијата продолжува и ќе нè следи и оваа година, за жал. Мислам дека и во практика гледаме дека сите цени веќе одат нагоре, особено во делот на градежништвото, кое е една од најважните стопански дејности во Македонија, каде што цените веќе одат нагоре, и цените на чинење и цените на продажба, што дава еден знак дека оваа година инфлацијата ќе продолжи и мислам дека нема да се намали како што е предвидено на 5 проценти“, вели Ќура.
Претседателот Ќура како проблем на стопанството меѓу другото ги посочува и недостигот од работна сила и ниската продуктивност. Оттука, според него, македонскиот бизнис-сектор не е подготвен за воведување нови концепти за работа – како идејата за четиридневна работна недела.
„Ние сме далеку од таа идеја. Ние имаме голем проблем со недостигот од работна сила, како и со ниската продуктивност на работниците, за што се виновни сите чинители. Потребни се обуки на работниците за да може да се кренат и нивните плати, а со тоа и продуктивноста на бизнисите. Дури тогаш би можеле да мислиме за намалување на работната недела, бидејќи во вакви околности нам не ни се доволни ниту пет работни дена“, вели Ќура.
.webp){kind=icon}
Во моментов нема коментари за веста. Биди прв да коментира...