.webp){kind=icon}
И четири години по влегувањето на Македонија во НАТО, мал е бројот на компании што покажале интерес за пласман на пазарот на Алијансата.
Досега процесот на сертификација го поминале четириесетина фирми и влегле во регистарот на компании што можат да се пријават на тендерите на НАТО-пазарот, кој е тежок над 10 милијарди евра.
Но прашање е колку од нив успеале да стигнат до некоја јавна набавка и да пласираат македонски производи на огласите на пазарот на Алијансата, каде што се бара сè и сешто - од воена опрема до храна и лекови.
Проблем е пристапот до навремени информации, вели во интервју за „Блумберг Адрија“ Џемаил Даути, генерален директор на „Даути комерц“, компанија што го помина процесот на сертификација за пласман на пазарите на Алијансата.
Џемаил Даути
Bloomberg Adria
„На македонските компании вратата им е отворена, но проблем е слабата информираност. Потребно е да се посвети поголемо внимание и сериозност на Министерството за одбрана и Министерството за надворешни работи за се направи една добра лоби-група за влез на македонските компании на тој пазар. Во делот на снабдувањето на пример на Алијансата има над 20.000 компании, а ние имаме тешкотии до доаѓање на навремени и конкретни информации за што и каде се бара“, вели Даути.
Според него, македонските компании имаат капацитет да обезбедат услуги и производи за потребите на НАТО, но клучна улога во процесот треба да одиграат и институциите.
Џемаил Даути (ТВ-гостување)
Bloomberg Adria
„Ние сме компатибилни за нивните потреби, почитувајќи ги националните стандарди и правните регулативи што Алијансата ги бара од аспект на безбедност, квалитет, експедитивност итн. Имаме добри компании и во делот на индустријата, логистиката, ИТ-секторот итн. и може да учествуваме на тие тендери, но за поголема конкуренција се потребни државна поддршка и логистички тим за полесен пристап на компаниите до овој пазар“, вели Даути.
Инаку, министерката за одбрана Славјанка Петровска неодамна најави дека наскоро ќе биде испратен претставник од нашата земја во Агенцијата за поддршка и набавки за да се олесни пристапот на македонските компании до НАТО-пазарот.
„Станува збор за значаен пазар од над 10 милијарди евра на годишно ниво, кој не смееме да го пропуштиме. Мораме да бидеме амбициозни, да се натпреваруваме со квалитет и со капацитети и да докажеме дека македонските компании технолошки и развојно можат да одговорат на барањата и да бидат конкурентни со компаниите во сојузничките земји“, рече министерката.
