.webp){kind=icon}
Македонија има потенцијал за големи успеси во филмската индустрија во светот, вели најнаградуваниот македонски режисер Милчо Манчевски во интервју за „Зум ин“ на „Блумберг Адрија“.
Манчевски посочува дека Македонија има талентирани луѓе, но потребна е вистинска поддршка од страна на институциите и на државата.
„Ако ние сме се договориле како заедница дека сакаме да правиме уметност, дека сакаме да имаме култура, ако сме решиле да инвестираме и пари и луѓе, тогаш тоа треба да се прави на чесен начин“, вели Манчевски.
Тој додава дека Македонија има талентирани луѓе, исклучителни глумци, талентирани помлади режисери и филмска екипа.
„Многу ми е драго што се работат сè повеќе копродукции во Македонија, затоа што тоа е еден од критериумите за вредноста на едно дело, а кога го работевме ’Пред дождот’, тоа беше апсолутно прва копродукција“, вели Манчевски.
Тој додава дека тогаш првпат македонска екипа соработувала со странски, а имало и многу смешни и многу пријатни и непријатни ситуации.
„Сега, 30 години подоцна, гледаме дека има повеќе копродукции каде што Македонија или е носител или учествува како малцински копродуцент и тоа мора да се негува. Тоа мора апсолутно да се поттикнува. Треба да постои еден чесен и објективен начин во оценувањето на проектите, барем кога станува збор за трошењето државни пари. Имаме ситуација каде што веќе седум години е истиот финансиски советник или е истиот рецензент што оценува, иако според законот и правилникот не е квалификуван да оценува“, вели Манчевски.
Милчо Манчевски (ТВ-гостување)
Bloomberg Adria
„Пред дождот“ годинава одбележува 30 години. А снимањето на новиот филм на Манчевски е заглавено низ државните лавиринти и, како што посочува, корупциски скандали. Но, и покрај блокадите од Агенцијата за филм, Манчевски посочува дека сега Агенцијата ја раководи нов тим и се надева дека работите ќе тргнат на подобро.
„Се надевам дека прво ќе се работи многу позаконски, почесно, потранспарентно. Ќе нема местење конкурси и корупција како досега и, второ, лично од моја перспектива се надевам дека ќе го одблокираат 'Збогум, Kопакабано' за да можеме да го снимиме годинава како што беше планирано да аплицираме на ’Еуроимаж’ како што би сакале, бидејќи рокот на апликација е до четврти април и да не ги разочараме и странските партнери, бидејќи тоа би било срамота“, вели Манчевски.
Стратегија за развој на филмската индустрија
Во однос на стратегијата за развој на филмската индустрија, Татјана Ќуричинска Пепељугоска, македонска претставничка во „Еуроимаж“, вели дека стратегијата не смее да остане само нешто напишано на хартија.
„Мора да им се посвети внимание на талентираните нови кадри, бидејќи само така можеме да добиеме нови имиња во кинематографијата, во глума, камера итн. Мора да се најде начин како да се поттикнуваат и режисерите односно продуцентите што имаат веќе осведочено добри дела зад себе, кои се наградувани на фестивали, а такви се многумина, и кои понатаму треба да продолжат да снимаат“, вели Ќуричинска Пепељугоска.
„Еуроимаж“ во периодот од 2018 досега, односно откако во овој европски фонд Македонија ја претставува Татјана Ќуричинска Пепељугоска, има доделено три милиони евра за Македонија и поддржано 17 проекти.
Татјана Ќуричинска Пепељугоска
Bloomberg Adria
Манчевски додава дека во однос на образовниот процес треба многу да се работи и да се променат многу нешта, а тоа го зборува преку искуството од светските универзитети во кои предавал.
„Треба да има многу повеќе практична работа, значи помалку филозофирање, повеќе снимање. Мора да се вежба занаетот, мора да се вежба режисерскиот мускул. Гледам дека во Европа, особено кај нас, тоа не е толку случај. Тоа веројатно би била една генерална препорака“, вели Манчевски.
Тој додава дека втората препорака би била школите подобро да бидат интегрирани со индустријата.
„Ќе ви дадам еден пример. На првите филмови, директори на фотографија што дојдоа во Македонија да работат на мои филмови се луѓе што имаат номинации или добиваат ’оскари’. И ниту еднаш, барем во тие први години, не дојде ниту еден студент на камера да каже добар ден, јас сакам да гледам како работи, сакам да следам кои филтри ги става, само да гледам од страна и да молчам“, посочи Манчевски.
