Инфлацијата во Македонија е забавена. Во февруари беше измерена годишна стапка од три отсто, а очекувaњата се дека од средината на годината ќе има пад на каматните стапки.
„Во поглед на инфлацијата сè уште постојат одредени ризици што произлегуваат, секако, и од глобалната и од домашната сцена. Таа ситуација треба и постојано ќе се следи. Меѓутоа, под претпоставка дека нема да се појават нови притисоци врз цените и да кажеме волатилности во економијата, тогаш оваа стагнација кај каматните стапки што ја гледаме во овој период очекувам да се претвори во простор во текот на втората половина од годината за постепено олабавување на позицијата на монетарната политика“, вели Марјан Петрески, професор на Американ колеџ, во интервју за „Блумберг Адрија“.
Марјан Петрески
Bloomberg Adria
Тој додава дека клучно ќе биде како ќе се однесува ЕЦБ, односно од нејзините видувања на вкупните економски движења во еврозоната. Секако, ризици има и на домашната сцена.
Отворен Балкан
Во поглед на вработеноста и невработеноста, Петрески додава дека иницијативата Отворен Балкан нуди одредени можности.
„Сепак, трошоците за работната сила генерално помеѓу трите земји од иницијативата се слични. Меѓутоа треба да навлеземе малку подлабоко и да согледаме дека кај одредени занимања постојат разлики во платите. И кај тие занимања може да се јави одредена тенденција за мобилност во рамките на иницијативата. Односно на луѓето со тие занимања може да им биде привлечено да одат и да работат во соседна земја, меѓутоа постои друг контингент на занимање кај кои тенденцијата е сосема обратна“, вели Петрески.
Дополнително, како што посочува Петрески, често ја потценуваме нашата релативна отпорност за дневна или неделна мобилност на работната сила.
„Има поголема преференца кај нашите работници тие да не патуваат долго и често до работното место. А дополнително, ако некој сака да се исели, тоа веројатно нема да го стори во Србија и во Албанија. Така што за Отворен Балкан повеќе ќе зборуваме за можности, за евентуални дневни или неделни мобилности, особено во пограничните региони, како и за потрајна мобилност“, вели Петрески.
Професорот заклучува дека тој сепак не очекува недостигот од квалификувана работна сила, со кој се соочуваат сите земји во регионот, да биде драматичен ниту да има некое особено значајно влијание врз нашиот пазар на трудот.
.webp){kind=icon}
