Во наредните децении паметните чипови ќе имаат значајно место во секојдневните операции што се изведуваат на мозокот или на ’рбетниот мозок или пак на периферните нерви, вели неврохирургот Томи Камилоски во интервју за „Блумберг Адрија“.
„Со тоа значително би се подобрил квалитетот на животот на оние пациенти што се парализирани, на оние пациенти што го изгубиле говорот или пак изгубиле некоја функција што со помош на овие чипови би им се вратила. Се надеваме дека тоа ќе стигне во блиска иднина, бидејќи иднината на неврохирургијата е охрабрувачка, особено во контекст на глобалните здравствени предизвици, и сметам дека чиповите ќе заземат сериозен дел од протоколарните хируршки интервенции што ќе се изведуваат во иднина“, вели Камилоски.
Сепак, Камилоски додава дека без разлика како технолошки ќе изгледа светот во 21 век, раката и мозокот на неврохирургот ќе бидат клучниот фактор за успешен исход при лекување на неврохируршките пациенти.
„Очекувам во наредните децении технолошки напредок на неврохирургијата, и тоа да се подобрат техниките на снимање, да има напредок во роботиката, во системите за навигација. Очекувам дека ќе има напредок во генетската терапија, но ќе има напредок и при користењето вештачка интелигенција, пред сè за собирање и обработка на податоци што секако би дале подобри резултати. Овие промени што ќе ги забележиме во децениите што доаѓаат сигурно ќе го подобрат лекувањето, ќе го подобрат и квалитетот на животот на пациентите“, вели Камилоски.
Постојат апарати без кои е незамисливо да се изведе неврохируршка интервенција, како што се невронавигацијата, електрофизиолошкото и неврорадиолошкото снимање, мапирањето на мозокот, како и роботската неврохирургија.
„Овие иновативни технологии ни овозможуваат прво да го лоцираме проблемот и да знаеме со каков проблем се соочуваме. Потоа, со помош на оваа иновативна технологија, ни се овозможува да ја испланираме операцијата и притоа да го користиме најбезбедниот пат, со што би оштетиле што помалку мозочно ткиво. Исто така, ако некогаш било незамисливо да се отстрани некој тумор што се наоѓа на некоја недостапна локализација, сега, со помош на оваа технологија, таа недостапна локализација станува достапна или може да се извади што поголемо количество тумор, а исто така можеби ќе може да се извади и целиот тумор“, вели Камилоски.
Сепак, тој заклучува дека за да се користат овие иновативни технологии се потребни едукација и обука на неврохирурзите за да можат успешно да ги интегрираат сите иновативни технологии во практика.