Револуционерни иновации на годината: Избор на топ 10

Лас Вегас и годинава стана центар на технолошкиот свет, каде што за време на четири дена се одржува долгоочекуваната конференција ЦЕС (CES 2025), па посетителите од сите краишта на светот откриваат што носи новата година – од револуционерни чипови кои ветуваат, до новитети во вештачката интелигенција и роботи кои би се грижеле за нашите идни потреби.

Гиганти како „Енвидија“ (Nvidia), „Самсунг“ (Samsung) и „Тојота“ (Toyota) покажаа што нè очекува во 2025 година и понатаму, со откривање на нови производи и проекти на иднината, како и концепти. Покрај напредни решенија за паметни куќи и носливи уреди, овогодинешниот саем понуди и увид во иднината на автономните возила, одржливите технологии и уметничките иновации – од кои некои нè изненадија, а други нè забавуваа.

Bloomberg

Напредок во вештачката интелигенција (ВИ) 

„Самсунг“ на ЦЕС 2025 претстави нова платформа Хоум еј-ај (Home AI), која овозможува поврзување на сите паметни уреди во еден систем. Оваа платформа е наменета за автоматизација на домашното опкружување користејќи вештачка интелигенција за оптимизација на потрошувачката на енергија и прилагодување на корисничкото искуство. Покрај тоа, најавен е паметниот ВИ придружник Боли (Ballie), кој може да комуницира со корисниците и да извршува основни задачи. Телевизорите со ВИ интеграција сега ја прилагодуваат содржината врз основа на корисничките преференци и осветлувањето во просторијата. Пристапот на „Самсунг“ говори за иднина во која уредите со ВИ ќе бидат центар на паметниот дом.

ЛГ (LG) претстави концепт "Affectionate Intelligence", кој ја вклучува Фурон (LG FURON), вештачка интелигенција која го прилагодува домашното опкружување. Системот функционира како личен асистент кој ги учи навиките на корисникот и создава оптимални услови за работа, опуштање и спиење. Акцентот е на емоционалната димензија на ВИ, која овозможува поприродна интеракција со уредите. Овој пристап на ВИ претставува нов чекор кон технологија која не само што автоматизира туку и го подобрува квалитетот на животот. ЛГ најави и проширување на оваа технологија на други уреди, како што се фрижидери и клима-уреди.

„Енвидија“ воодушеви со претставувањето на чипот ГБ10 грејс блеквел (GB10 Grace Blackwell), дизајниран за суперкомпјутери и напредни ВИ апликации, кој овозможува брзо процесирање на податоци во области како здравството и симулациите на климата. Графичката серија Џифорс РТХ 50 (GeForce RTX 50) постави нов стандард во индустријата за видеоигри со подобрени перформанси и технологија ДЛСС 4.0 (DLSS 4.0). Покрај тоа, претставени се и системот Драјв тор (Drive Thor) за автономно возење, кој ги поврзува безбедноста и енергетската ефикасност. „Енвидија“ со овие иновации го докажува своето влијание во индустриите, од автомобилската индустрија до визуелните технологии.

Од мерење хормони до превод во живо

„Дел“ (Dell) претстави монитор со аудио функција кој ги следи движењата на главата и е особено прилагоден за гејмери. Овој екран овозможува гејминг искуство со прецизно препознавање на корисничките движења, бидејќи аудио функцијата го прилагодува звукот на просторот и ги намалува пречките од околината. Дел 32 плус 4К (Dell 32 Plus 4K QD-OLED) користи инфрацрвен сензор и вештачка интелигенција за да ги следи движењата на главата на корисникот и го насочува звукот директно кон неговите уши.

Bloomberg

„Тајмкетл“ (Timekettl) на ЦЕС 2025 претстави сет за преведување во реално време, кој ветуваат подобрена меѓународна комуникација. Сетот овозможува преведување на разговори во живо, вклучувајќи телефонски повици – функција која ретко ја гледаме кај вакви уреди – а предвиденото доцнење на преводот ќе биде меѓу три и пет секунди. Поддршката за 40 јазици и 93 акценти овозможува поприродно разбирање меѓу говорниците на различни јазици. Уредот е дизајниран за патници, претприемачи и тимови со глобален дострел, бидејќи ефикасно ги намалува јазичните бариери.

Хормометар (Hormometer) на компанијата „Ели хелт“ (Eli Health) овозможува домашно тестирање на хормони, што нуди персонализирани здравствени податоци. Уредот е едноставен за користење и анализира хормони како кортизол, тестостерон и естроген. Корисниците добиваат прилагодени препораки за подобрување на здравјето врз основа на резултатите. Хормометар е пример како здравствената технологија се приближува до корисниците и овозможува превентивна грижа за здравјето. Оваа иновација може да помогне во надминување на јазот меѓу пациентите и здравствениот систем.

 

Роботски иновации 

„Јукаи“ (Yukai Engineering) претстави робот Мируми (Mirumi), мала влакнеста направа која се прицврстува на торба или ранец. Мируми користи сензори за детектирање на близината на луѓе или објекти и реагира на нив со движења и вртење на главата, имитирајќи љубопитност. Ако некој се приближи премногу брзо, роботот се повлекува, што создава впечаток на срамежливост. Наменет е за забава и интеракција со луѓето, а не содржи вградена вештачка интелигенција.

 

„Енчентед тулс“ (Enchanted Tools) на саемот претстави хуманоиден робот Мирокаи (Mirokai). Тој се движи со помош на самобалансирачка топка, што му овозможува агилност и прилагодливост во различни околини. Неговото лице, инспирирано од аниме естетиката, се проектира и анимира во реално време, овозможувајќи поприродна интеракција со корисниците.

 

Паметен дом и здравје 

Бјути мирор (Samsung Micro LED Beauty Mirror) е паметно огледало кое на корисниците им нуди совети за нега на кожата и убавина. Огледалото користи вештачка интелигенција за анализа на кожата и предлага персонализирани решенија. Покрај тоа, овозможува прикажување на видеоснимки од вежби и совети за здрав начин на живот. Овој уред на уникатен начин ги спојува естетиката, здравјето и технологијата, овозможувајќи им на корисниците да имаат промислена и персонализирана грижа за својот изглед.

 

Рокет 2.0 (Rocket 2.0 Smart Irrigation Platform) на компанијата „Фул нејчер фармс“ (Full Nature Farms) е систем за паметно наводнување кој ја оптимизира потрошувачката на вода. Системот користи вештачка интелигенција за анализа на временските податоци и потребите на растенијата. Ги намалува трошоците за наводнување за 30 проценти, што е клучно за земјоделството и градинарството. Уредот е прилагоден за помали и средни фарми кои сакаат да го намалат својоето влијание врз околината. Оваа иновација го нагласува значењето на одржливоста во технологиите за паметни домови.

Како мислат возачите 

„Тојота“ (Toyota) конечно објави новости за својот проект Woven City, град на иднината кој е наменет за тестирање на автономни возила и паметни технологии. Во овој град живеат истражувачи и технолози кои развиваат иновации за урбана мобилност. „Тојота“ користи реално опкружување за тестирање на технологии како водородни возила и паметни домови. Проектот ја нагласува важноста на интердисциплинарниот развој и одржливоста.

„Енвидија“ на презентацијата откри дека ќе започне соработка со јапонската марка „Тојота“. Чипови и оперативен систем од типот Драјв (Drive) ќе бидат вградени во автомобилите на „Тојота“ за напојување на електронските системи за напредна помош на возачот.

 

Имаше навистина многу интересни новитети, а еве уште некои од нив:

- Роборок Сарос (Roborock Saros Z70): роботска правосмукалка со роботска рака за поместување пречки/подигнување отпад;

- Нитро Блејз (Acer Nitro Blaze 11): преносен гејминг уред со голем екран;

- Стејџ Пауергрип (Belkin Stage PowerGrip): батериски додаток и држач кој имитира DLRS камера за ајфон;

- Кептифај (Captify): очила кои титлуваат разговори за лица со оштетен слух;

- Тактсјут (bHaptic TactSuit): хаптички елек за поинтензивно гејминг искуство.