Забавувањето на инфлацијата, чија годишна стапка во јули изнесува три отсто и втор месец има тренд на намалување, за разлика од мај, кога стигна до 4,5 отсто, може да го подобри расположението кај потрошувачите. Од друга страна, се најавува влез на нови играчи на пазарот на малопродажба, а многу од тие синџири се решаваат да влезат на македонскиот пазар затоа што очекуваат да продолжи тој тренд на раст на малопродажбата, вели Дејан Манев, експерт за развој на малопродажни мрежи, во интервју за ТВ Блумберг Адрија.
„Нормално, тука секогаш може да има некои фактори што ќе влијаат на тие предвидувања, како што е инфлацијата, која во овој момент е стабилна, но треба да се задржи подолго време на таа стапка за да дојде до средување на сите гранки во индустриите, за да можат компаниите соодветно да ги испланираат своите продажни канали“, вели Манев.
Дејан Манев (ТВ-гостување)
Bloomberg Adria
Во последните две години не беше лесно и можно да се прават планови, затоа што имавме бројки на инфлација што слободно може да кажеме дека се страшно тешки за секоја индустрија.
„Тие бројки не овозможија крајниот консумент лесно да се одлучи да троши многу пари очекувајќи дека можеби цените ќе паѓаат или, пак, да се чуваат заштедите, а на тој начин се влијае на обемот на малопродажба“, вели Манев.
Во Македонија трговијата на мало постепено закрепнува, но цифрите од 2024 година сè уште се слаби и едвај доволни за да се надмине 2023 година.
Според аналитичарите, Македонија досега забележа висок пораст на платите во 2024 година (+11 проценти реален раст годишно во периодот јануари-мај 2024 година), но потрошувачкиот потенцијал не се прелеа во трговијата на мало. Главна пречка беше помалата склоност на потрошувачите да трошат. Најавата за влез на „Лидл“ и „Конад“ на македонскиот пазар се очекува да донесe промени во малопродажбата.
„Здрава конкуренција е добредојдена. Добро е што ќе се внесат нови технологии на пазарот“, посочува Манев за најавата за влез на нови играчи на пазарот на малопродажбата во Македонија.
„Добро е и за работната сила што ќе има можност да се обучува во тие интернационални компании и долгорочно некои од нив ќе останат и на македонскиот пазар, односно потоа ќе се трансферираат во некои домашни компании“, вели Манев, кој додава дека работната сила е флуктуирачка, особено во последните години.
Во однос на конкурентноста на македонските компании на странските пазари, Манев посочува дека тоа е тема за која често се говори и јасно е дека е потребно да се групираат домашните компании, да побараат поддршка од државата пред сè за своите артикли, треба да бидат храбри затоа што секој пазар си има свои посебни параметри и навики на купувачи.
„Треба да бидат подготвени за борба од три до пет години пред ги видат соодветните финансиски резултати“, вели Манев.
Тој посочува дека дигиталните технологии мора да бидат во фокус, особено за освојување странски пазари.
Во однос на очекувањата за инфлацијата, Манев смета дека не може да бидеме крајно сигурни дека нема да има изненадувања, особено поради геополитичките случувања и затоа што сè уште сме во нестабилни зони.
.webp){kind=icon}
Во моментов нема коментари за веста. Биди прв да коментира...