Десет книги што ќе ги сакате во 2024 година

Оваа година ќе биде полна со неизвесност, но списокот на книги што ни доаѓаат е нешто на што можеме да сметаме. Така, во 2024 година, свртете се кон фикцијата и пронајдете сосема нови светови, светови што се нацртани врз основа на нашите, но со нова, критичка перспектива. Најочекуваните наслови од областа на нефикцијата се водичи за светот во кој живееме. Овие 10 книги не се сеопфатни, но тие се одлично место за почеток.

НЕФИКЦИЈА

Технофеудализам: Што го уби капитализмот (Techno feudalism: What killed capitalism)

Автор: Јанис Варуфакис

Еден од ретките економисти што се најдоа на меѓународната листа на бестселери, Варуфакис е познат по неговите централнолевичарски политички ставови и отворени изјави кога беше министер за финансии на Грција. Неговата нова книга тврди дека капитализмот е завршен и дека неговата злобна замена се појавила во форма на „биг тек“ (Big Tech) компании што ја презеле контролата врз поголемиот дел од глобалното општество. Не е чудно што Варуфакис не е поддржувач на новиот поредок.

Излегува: 13 февруари 2024 година

Зрачење: Животот и линијата на Кит Харинг (Radiant: The Life and Line of Keith Haring)

Автор: Бред Гуч

Харинг, кој почина во 1990 година поради компликации поврзани со сида, беше еден од најпознатите уметници во 1980-тите и еден од првите успешни самопромотори што совршено се вклопија во просторот од високата уметност до поп-културата. Авторот на признаената биографија на поетот Френк О’Хара и на писателот на фантастика Фландри О’Конор имал отворен пристап до архивата и на овој уметник.

Излегува: 5 март 2024 година

Чеканот: Моќ, нееднаквост и борба за душата на трудот (The Hammer: Power, Inequality, and the Struggle for the Soul of Labor)

Автор: Хамилтон Нолан

По координирани повеќемесечни штрајкови во текот на 2023 година, синдикатите на работниците од автомобилската индустрија, сценаристите и актерите добија невидени (и, искрено, неочекувани) отстапки од работодавците. Тоа беше доказ дека американските синдикати, иако умираат со години, сепак можат да постигнат резултати за своите членови од средната класа. Нолан, неапологетскиот промотор на организираното работничко движење што помогна во развојот на синдикатите во дигиталните медиуми, тврди дека ова е најдобриот, а можеби и единствениот начин САД да го затворат јазот меѓу богатите и сите други.

Излегува: 13 февруари 2024 година

Шемата Хамилтон: Епска приказна за парите и моќта во американската основа (The Hamilton Scheme: An Epic Tale of Money and Power in the American Founding)

Автор: Вилијам Хогеланд

Благодарение на мјузиклот на Лин-Мануел Миранда, Александар Хамилтон неодамна инспирира многумина да ги истражат неговиот лик, неговото наследство и времето во кое живеел. Повеќето заклучоци беа позитивни, но Хогеланд тврди дека тие превиделе делови од идеологијата на Хамилтон, првенствено неговото верување во моќта на олигархијата.

Излегува: 28 мај 2024 година

Еверест (Everest, Inc.)

Автор: Вил Кокрел

Освојувањето на Монт Еверест од речиси натчовечко достигнување стана нешто тривијално – нешто што богатите луѓе го прават за да кажат дека го направиле тоа. Покрај очигледно подобрата опрема и подобрата подготовка, трансформацијата на начинот на освојување на Еверест денес ја донесе и индустријата за водичи на Хималаите. Кокрел, кој го покриваше планинарството за време на својата кариера како писател и уредник на списанија, ја раскажува помалку познатата приказна за овие претприемачи, чија генијалност, увид и чиста напорна работа доведоа до бум во индустријата.

Излегува: 16 мај 2024 година

ФИКЦИЈА

Светлиот меч (The Bright Sword)

Автор: Лев Гросман

Гросман стана познат по својата најпродавана фантастична трилогија „Волшебниците“, верзија за возрасни на книгите за Хари Потер, која, за жал, беше претворена во бедна ТВ-серија. Држејќи се до фантазијата, тој се враќа неколку стотици години назад во Камелот, кој е во урнатини. Кралот Артур загина во битка, а неколкуте преостанати витези на тркалезната маса не се баш врвен тим. Со Британија опколена од непријатели, магичниот и смртен млад витез Колум го носи тешкиот товар на одговорноста да ја поправи ситуацијата.

Излегува: 16 јули 2024 година

Моите пријатели (My Friends)

Автор: Хишам Матар

Матар ја доби Пулицеровата награда во 2017 година за неговите мемоари „Враќање: Татковци, синови и земјата помеѓу“, во кои е опишан обидот на писателот од Лондон да го реши случајот со исчезнувањето на неговиот татко во Либија. Сега тој се занимава со истите теми – отуѓување, егзил, враќање дома – во романот што ги следи Калед, Либиец, и неговите пријатели во Обединетото Кралство во текот на неколку децении.

Излегува: 9 јануари 2024 година

Кажи му здраво на мојот мал пријател (Say Hello to My Little Friend)

Автор: Џенин Капо Крусет

Нешто помеѓу „Лице со лузна“ и „Моби Дик“, оваа новела го следи Исмаел Рејес (Изи), неуспешен имитатор на славни личности што се обидува да успее. Сцената е поставена во Мајами, а приказната, во стилот на „презаситен трескав сон“, постепено се развива и вклучува и други ликови покрај Изи и неговите непосредни грижи, како што е Лолита, заробена орка во морски аквариум во Мајами.

Излегува: 5 март 2024 година

Среќа (Lucky)

Автор: Џејн Смајли

Смајли, која ја доби Пулицеровата награда во 1992 година за приказната за фармер од Ајова што на катастрофален начин се обидува да го подели наследството меѓу неговите три ќерки, сега ја носи приказната за музичар чиј пат до славата е во спротивност со егзистенцијалниот копнеж.

Излегува: 23 април 2024 година

Лонг Ајленд (Long Island)

Автор: Колм Тоибин

Ова е продолжение на најпродаваниот роман на Тоибин „Бруклин“, а приказната продолжува 20 години подоцна. Оригиналот беше екранизиран во 2015 година, со Серж Ронан во главната улога, и ја следи Ајлиш Лејси, млада жена што емигрирала од Ирска во 1950-тите. Ајлиш, која сега е мажена жена со две деца и живее среќно во предградието Лонг Ајленд, одеднаш се соочува со животот што го оставила зад себе.

Излегува: 7 мај 2024 година

 

Во моментов нема коментари за веста. Биди прв да коментира...

Остави коментар