Денес тоалетот е најважната просторија во ресторанот

Кога ќе влезете во „Кокодак“ (Coqodaq), популарниот ресторан за пржено пилешко и шампањ, првото нешто што ќе го забележите не е блескавиот засводен таван, сјајот во ноќниот клуб или гламурозниот домаќин.

Првото нешто што го забележувате е редот мијалници.

Тоа не се само некои стари мијалници. Директно од влезната врата се наоѓа простор за миење раце со мијалници вградени во држачи од стеатит и опремени со бронзени патинирани италијански славини, како и шест диспанзери со луксузни течни сапуни од брендови како „Ле лабо“ (Le Labo) и „Лоеве“ (Loewe). Овалните огледала со затемнети стакла се опкружени од дифузна светлина – доволно е само да се погледнете во едно од нив и веднаш ќе станете ѕвезда на забавата.

Дејвид Роквел, кој го дизајнираше ентериерот во „Кокодак“, го донесе тоалетот во прв план за да обезбеди пријатен и смирувачки премин од раздвижените улици на Менхетен кон поинтимната клупска атмосфера на ресторанот.

Тој не планираше тоа да биде место за правење самослик, но кое добро осветлено огледало не служи за таа цел деновиве

„Нашата цел е да овозможиме ефект на поласкав тродимензионален изглед на лицето во тоалетите“, вели Роквел, кој ги дизајнирал ентериерите на хотелите „Нобу“ низ светот, хотелот „Космополитен“ во Лас Вегас и казиното „Марина беј сендс“ во Сингапур, меѓу другите.

Лиза Грејп, една од основачите на студиото за внатрешен дизајн „Џојн студио“ (Joyn Studio), која ги дизајнираше „Чез Фифи“ (Chez Fifi) во Њујорк и познатиот ресторан „Францен“ (Frantzén) во Стокхолм, исто така го нагласува осветлувањето во тоалетите.

„Една од најважните работи кога станува збор за украсување на тоалетот е светлината. Сакате посетителот да се чувствува убаво, самоуверено и секси кога ќе се погледне во огледало“, вели таа и објаснува: „Совршена светлина за правење самослик, но во исто време не е премногу светло бидејќи откривањето премногу може да ве натера да посакате да си одите дома“.

Mark Cocksedge

Екстравагантни тоалети никнуваат низ светот додека рестораните бараат начини да ги претворат корисниците на социјалните мрежи во неплатени промотори: Има повеќе од девет милиони објави со хаштагот #bathroomselfie на Тикток и речиси исто толку видеа што објаснуваат како да се направи најдобриот самослик.

Ресторанот „Џорџа траторија“ (Giorgia Trattoria) во Минхен ја сфати пораката – во тоалетот на ресторанот секој дел од ѕидот е покриен со мали плочки што рефлектираат светлина, а од таванот висат десетина дискотопки.

„Бачаналија‘ (Bacchanalia), медитерански ресторан во Лондон на познатиот бизнисмен Ричард Керинг, откако е отворен во декември 2022 година им дава добар изговор на гостите да одат во тоалет. Дизајнот, замислен во соработка со студиото „Мартин Брудниски дизајн“, содржи подови од мермерни плочи во тоалетите, кои се шират во форма на ливчиња додека насликани лози се спуштаат од таванот надолу по ѕидовите. Во центарот доминира кружен мијалник.

Дуото повторно соработуваше на дизајнот на популарниот јапонски ресторан за храна „Секси фиш Манчестер“, кој е украсен со огромни скулптури на морски животни на Демиен Хирст. Концептот го вклучува и тоалет во кој доминира огромен мозаик од сирена и се прелева во розови и сини тонови.

Како што може да очекувате, населбата Вилијамсбург во Бруклин исто така има тоалет што е вреден за внимание: ресторанот „Елнико“, отворен пред една година, на Инстаграм безобразно го нарекува својот неонски тоалет „соба за самослик“.

Johnny Stephens

Ресторан лесно може да остави траен впечаток со помош на драматичната бања, вели дизајнерката Меган Пауер од „Воркинд студио“ во Јужна Калифорнија. Токму затоа тоалетите во ресторанот „Ле ког“ (Le Coq) во Сан Диего ги обложи со тапети со психоделични мотиви, а ходникот обложен со светкави плочки, што води до тоалетите, го украси со два екстравагантни препарирани петли. „Тоа може да бидат најфотографираните делови од ресторанот и нешто за што луѓето ќе сакаат да разговараат со своите познаници“, вели таа.

Не е јасно кој прв го популаризира самосликот во ресторански тоалет, но меѓу првите инспирации беше тоалетот на луксузно уредениот ресторан „Скеч“ во Лондон, кој постои 20 години, а чиј тоалет со десетина тоалетни кабини сè уште е еден од најфотографираните ентериери во градот. Тоалетните кабини во форма на огромни бели јајца личат на футуристички меѓугалактички патнички капсули. Менаџерот на „Скеч“, Шинејд Малоци, вели дека сопственикот Мурад Мазуз бил инспириран од клубот „Парадајс гараж“ во Њујорк, каде што диџеите свиреле музика во тоалетите.

Johnny Stephens

Вниманието посветено на впечатокот што го остава тоалетот може да се манифестира на посуптилни начини. Во познатиот нов ресторан за морска храна „Пени“, сместен на кат во Ист Вилиџ во Њујорк, косопственикот Чејс Синзер вели дека некое време повеќе размислувал за сапунот и свеќите во бањата отколку за кој било друг детаљ во ресторанот. „Ако се гордеете што внимателно го декорирате вашиот ресторан, бањите се добро место да го покажете тоа“, вели тој.

Но, тешко е да се воздржите. „Ксанду ролер артс“, новиот ноќен клуб со подиум за ролери во Бруклин, освен по груманскиот хотдог, познат е и по „Клуб флаш“  -црвениот тоалет со сопствен диџеј, специјално озвучување и подиум за танцување. „Сè е подобро со диџеј“, вели основачот на клубот Варун Катарија.

Во моментов нема коментари за веста. Биди прв да коментира...

Остави коментар