Криптоменувачници во регионот Адрија - од пионери до искусни играчи

Глобалниот пазар на платформи за размена на криптовалути доживеа значителен раст и се предвидува дополнително да се прошири во наредните години. Со проектирана вредност од 110,12 милијарди долари до 2028 година и силна годишна стапка на раст од 16,08 отсто, пазарот покажува силен замав поттикнат од различни фактори.

Во овој преглед даваме анализи на најголемите и најпопуларни криптоменувачници во регионот.

„Електрокоин“ (Electrocoin): Пионер во регионот Адрија

Кога Никола Шкориќ го основа „Електрокоин“ во 2014 година, идејата за посредување во тргувањето со криптовалути сè уште беше во повој. Но со поддршка од партнерот Марин Маржиќ, оваа мала хрватска компанија брзо прерасна во клучен играч на европската сцена. Денес „Електрокоин“ има 29 вработени и работи низ Европската Унија и зоната СЕПА, со повеќе од 40.000 клиенти и над 250.000 извршени трансакции.

Компанијата оствари приход од 53 милиони евра во 2023 година, а покрај успешното работење, „Електрокоин“ е позната и по својот иновативен пристап кон криптоплаќањата. Нејзината платформа им овозможува на трговците без проблем да прифаќаат плаќања со криптовалути преку PayCek, бесплатна услуга што ја користат повеќе од 500 трговци на над 3.000 локации низ Европа.

Bloomberg

Платформата на „Електрокоин“ нуди лесно купување, продавање и размена на криптовалути преку банкарска сметка, картичка или криптопаричник.

За оние што го претпочитаат традиционалниот начин на водење бизнис, „Електрокоин“ соработува со партнерски менувачници низ Хрватска, каде што корисниците можат да разменуваат криптовалути за готовина. „Електрокоин“ нуди дури 47 различни криптовалути, од кои најпознати се биткоин (BTC), етер (ETH), тетер (USDT), бајненс коин (BNB) и солана (SOL).

Со оваа понуда и приспособливи услуги, „Електрокоин“ не само што ги следи светските трендови туку и поставува нови стандарди на домашниот пазар.

Една од најголемите предности на менувачницата на Шкориќ е можноста за користење на услугата за размена без потреба од регистрација, која им овозможува на корисниците брзо и дискретно да испраќаат криптовалути директно до својот приватен криптопаричник по избор. Платформата овозможува и плаќање вирмански сметки со криптовалути, така што криптовалутите може да се користат за плаќање голем број сметки, како што се сметки за струја, за парно, телекомуникациски услуги, но и трошоци, како што се сметки за автомобил, патувања, па дури и купопродажба на недвижен имот. Корисниците исто така имаат пристап до физичка размена на криптовалути за готовина дури на 19 локации низ Хрватска.

Безбедност на платформата

Бидејќи основачите на „Електрокоин“ доаѓаат од нуклеарната и индустријата за сајбер-безбедност, кои по својата природа бараат високи безбедносни стандарди, нивната професионална заднина им овозможи да го пренесат своето искуство од тие индустрии во безбедносната архитектура на „Електрокоин“.

Па така, највисоките стандарди на безбедносниот систем се вградени во темелите на „Електрокоин“ уште од самиот почеток и тие континуирано се ревидираат и надградуваат.

„Личните податоци на корисниците на платформата се шифрирани и достапни само кога е потребно и само за лица со дозволено ниво на овластување. Оваа постапка ни овозможува да ги исполниме законските обврски во чии рамки ги собираме потребните податоци. Исто така, корисничките средства се одвоени од нашите средства во сегрегирани сметки, а пристапот до тие сметки е можен само за ограничен број овластен персонал со неопходни, повеќекратни проверки и потписи пред да се извршат какви било операции“, изјави Никола Шкориќ за „Блумберг бизнисвик Адрија“.

Depositphotos

„Битстемп“ (Bitstamp): Најдолговечната криптоменувачница на светот

Годината е 2011-та - криптовалутите сѐ уште се во повој, а ентузијастите низ светот се обидуваат да го предвидат нивното влијание врз иднината на финансиите. Во тој момент двајца пријатели во Словенија, Нејц Кодрич и Дамијан Мерлак, решаваат да лансираат платформа што на луѓето ќе им овозможи едноставен, безбеден и регулиран начин за тргување со криптовалути. „Битстемп“ е родена.

Основачката двојка прво ја регистрира менувачницата во Словенија, но подоцна, во април 2013 година, ја префрли регистрацијата во Обединетото Кралство, а потоа, во 2016 година, во Луксембург. Тие исто така аутсорсираа одредени операции во Обединетото Кралство поради недостиг од соодветни финансиски и правни услуги во Словенија.

Денес „Битстемп“ е најдолговечната криптоменувачница во светот, со повеќе од пет милиони корисници во над 160 земји. Од нивните скромни почетоци, тие прераснаа во глобална компанија со 500 вработени во канцеларии во Луксембург, Сингапур, Словенија, Обединетото Кралство и САД.

„Битстемп“  не е само за криптоентузијасти. Нивните услуги се приспособени за секого – од корисници што штотуку започнале со криптовалути до искусни трговци и големи институции. Купувањето криптовалути никогаш не било полесно: корисниците можат да вршат трансакции преку банкарски трансфери, кредитни картички, „Епл пеј“ (Apple Pay), „Гугл пеј“ (Google Pay), па дури и „Пејпал“ (PayPal).

Европските корисници во одредени земји имаат привилегија да користат Инстант СЕПА за побрзи депозити.

За институционалните клиенти, „Битстемп“ нуди услуги приспособени на нивните потреби. Нивната платформа „Bitstamp-as-a-service“ им овозможува на финансиските институции, финтек-компаниите и брокерите да интегрираат криптоуслуги во своите бизниси користејќи ја модуларната инфраструктура на „Битстемп“.

Напредните трговци ќе најдат сè што им треба на платформата „Битстемп про“ (Bitstamp Pro). Со графикони во реално време, детални податоци и алатки за анализа, оваа платформа нуди софистицирани опции за тргување и четири различни типа на нарачки.

Платформата на „Битстемп“ поддржува тргување со 80 криптовалути, како и валути фиат, како еврото, американскиот долар и британската фунта.

Depositphotos

„Битстемп“  посвети особено внимание на регулацијата, обезбедувајќи ги најстрогите регулаторни стандарди. Во секторите за усогласеност, регулатива, правни работи, управување со ризик, безбедност и внатрешна ревизија работат околу 180 луѓе или 29 отсто од вкупниот број вработени. Платформата седум пати по ред доби рејтинг АА како најдобро оценета криптоменувачница во извештајот „Репер за размена на Криптокомпер“ (CryptoCompare Exchange Benchmark).

Една од клучните предности на „Битстемп“ е заштитата на средствата на клиентите. Сите средства и криптовалути на „Битстемп“ се сто проценти покриени и достапни за повлекување во секое време, складирани во одвоени безбедносни сметки од корпоративните фондови. Дури 95 проценти од криптовалутите се чуваат офлајн во трезори од банкарска класа, што дополнително ја зголемува безбедноста од сајбер-криминалот.

Преостанатите пет проценти од криптовалутите се чуваат онлајн за да се овозможат брзи и непречени трансакции. Сопствениците на „Битстемп“ исто така имаат осигурување на средствата на клиентите складирани во ладни паричници.

„Битстемп“ поседува 52 лиценци и регистрации во клучните јурисдикции низ светот, обезбедувајќи строга усогласеност со регулаторните барања. Тие се првата криптоменувачница што доби лиценца за платежна институција во ЕУ и бит-лиценца во Њујорк. Повеќе од една четвртина од вработените се фокусирани на усогласеност, регулатива, правни работи, безбедност и ревизии.

Менувачницата ЕЦД (ECD) водечка во Србија

Менувачницата ЕЦД е основана во Белград во 2012 година од Александар Матановиќ, Александар Ќосиќ и Марко Матановиќ. Оттогаш оваа компанија од мал стартап стана една од водечките платформи за тргување со криптовалути во Србија. Иако менувачницата ЕЦД започна со работа првенствено во Србија, нејзините услуги сега се достапни за корисници од повеќе земји. Нивната приказна е доказ за тоа како упорната работа, паметните деловни одлуки и навременото препознавање на можностите може да се претворат во успешен бизнис-модел во динамичниот свет на дигиталните валути.

Во раните денови ЕЦД беше скромна компанија, која се фокусираше на обезбедување основни услуги за криптовалути. Меѓутоа, како што растеше интересот за оваа технологија, растеше и менувачницата. Тие денес имаат повеќе од 60.000 корисници, за кои се грижи професионален тим од 22 вработени. Овие експерти доаѓаат од различни области, како што се финансиите, технологијата и поддршката за корисници, обезбедувајќи квалитетна услуга и одговарајќи на потребите на растечката база на корисници.

Во однос на услугите, ЕЦД разви богато портфолио што ги задоволува различните потреби на корисниците, од поединци што сакаат едноставно да тргуваат со криптовалути до правни лица што бараат консултантски услуги. Нивната основна услуга останува купување и продавање криптовалути за динари, а надоместоците, кои се движат од 3,7 проценти до 4,7 проценти, им овозможуваат на корисниците да водат транспарентен бизнис. Покрај тоа, ECD Wallet е алатка што им овозможува на корисниците лесно да складираат, испраќаат и примаат криптовалути, со надоместоци што се јасни и разбирливи. За оние што сакаат да инвестираат во повеќе криптовалути одеднаш, постои услугата ECD Basket, која им овозможува да го диверзифицираат своето портфолио и да инвестираат во различни валути во еден потег.

Depositphotos

Еден од најинтересните аспекти на ЕЦД е нејзината мрежа на криптобанкомати, кои им овозможуваат на корисниците да купуваат и продаваат криптовалути за готовина.

Иако ЕЦД не ги објавува јавно своите финансиски показатели, нејзиниот континуиран раст и проширување на услугите доволно зборуваат за нејзината стабилност и успех.

Разновидноста на криптовалути што ги поддржува ЕЦД е уште една причина за нејзината популарност. Корисниците можат да тргуваат со 14 различни криптовалути, вклучувајќи ги и најпознатите, како биткоин и етереум, но и оние што штотуку добиваат популарност, како што се солана и полигон. Оваа разновидност им овозможува на корисниците да ги диверзифицираат своите инвестиции и да истражуваат различни опции во светот на дигиталните валути.

ЕЦД е регистрирана во Народната банка на Србија и Комисијата за хартии од вредност и работи во согласност со сите релевантни закони, вклучувајќи ги и Законот за дигитални средства и прописите против перењето пари.

Тие имаат јасно воспоставено процедури на KYC (Know Your Customer) и KYT (Know Your Transaction). Усогласеноста со регулаторните барања се следи на дневна основа, додека извештаите за усогласеност се подготвуваат на месечна основа.

Криптоменувачницата „Адријатик“ (ACX) нов играч од Бања Лука

Во светот на криптовалутите, каде што глобалниот пазар забрзано се развива и менува, една криптоменувачница од Бања Лука го привлече вниманието на инвеститорите и корисниците на домашниот пазар – „Адријатик крипто ексчејнџ“ (Adriatic Crypto Exchange -ACX). Основана е во октомври 2023 година од Бранко Петровиќ. Во првите осум месеци од своето постоење, платформата доби инвестиција од 6,3 милиони конвертибилни марки (3,15 милиони евра) од американската компанија „Модулус“ (Modulus), која го препозна потенцијалот на оваа млада, но амбициозна компанија.

Иако моментално работат исклучиво на пазарот во Босна и Херцеговина, нивните планови за проширување се јасни. Оваа криптоменувачница веќе гледа кон регионалните пазари, подготвувајќи го теренот за влез во соседните земји, што ќе ѝ овозможи понатамошен раст и зајакнување на нејзината позиција во регионот Адрија.

Depositphotos

„Адријатик“ нуди целосен опсег на услуги, кои се приспособени и за почетници во светот на криптовалутите и за искусни трговци. Една од клучните предности е нивниот избор на криптосредства. Во првата верзија на платформата, корисниците имаа пристап до 15 криптовалути, вклучувајќи ги и најпознатите, како биткоин, етереум, рипл и други популарни опции.

Но со доаѓањето на „Адријатик 2.0“ тој број значително ќе се зголеми. Платформата објави дека ќе поддржува тргување со неколку стотици криптовалути во иднина, овозможувајќи им на инвеститорите поголема разновидност на инвестициите, од стабилни валути до понови и поризични опции.

Еден од клучните елементи на безбедноста на менувачницата е паричникот „Фајрблокс“ (Fireblocks), кој се смета за еден од најбезбедните криптопаричници во светот.

„Адријатик“ може да се пофали дека е еден од првите даватели на услуги поврзани со криптовалути во Босна и Херцеговина што е регистриран во Комисијата за хартии од вредност на Република Српска. Тоа ја прави целосно легален и регулиран субјект, што влева дополнителна доверба кај корисниците.

„Крипто 12“ ги поставува темелите за модерна финансиска иднина

Во светот на дигиталните средства, менувачницата „Крипто 12“ (Crypto12), зад која стои белградската компанија „Вескон“ (Vescon), основана од Давид Веселиновиќ со уште двајца соосновачи, Владимир Вуксановиќ и Душан Петровиќ, ги поставува темелите за модерната финансиска иднина на Србија. Од своето основање во 2017 година, компанијата помина низ различни фази на развој, но клучниот момент дојде во декември 2022 година, кога доби лиценца за давање услуги од областа на дигиталните средства. Овој чекор ги отвори вратите не само на домашниот пазар туку и на глобалните можности, со специфичен пристап кон т.н. reverse solicitation, што овозможува давање услуги низ целиот свет.

Depositphotos

На официјалната веб-страница на „Крипто 12“ е наведено дека има 195 верификувани корисници, од кои 135 се физички лица. „Крипто 12“ не функционира само како менувачница. Тие создадоа екосистем на услуги приспособени на различни потреби – од основни трансакции за купување и продавање дигитални средства до напредни инвестициски опции во проекти DeFi и CeFi.

Нивната понуда им овозможува на корисниците активно да управуваат со портфолијата, како и т.н. стејкинг (забелешка: се однесува на процесот на чување одредено количество криптовалути во дигитален паричник за поддршка на операциите на блокчејн-мрежите, особено оние што користат Proof of Stake (PoS) или слични механизми за консензус), со што јасно се разликуваат од конкуренцијата. Провизиите се една од предностите што ги издвојуваат на пазарот: од 0,9 отсто за резиденти до 1,9 отсто за нерезиденти.

„Криптојунити“ успеа да се издвои од масата

Во светот на дигиталните валути, каде што се чини дека секојдневно се појавуваат нови платформи, „Криптојунити“ (CryptoUnity) успеа да се издвои од толпата. Менувачницата е основана од Ања Шинковец и Санди Шпенко во 2021 година. Оваа криптоплатформа со седиште во Љубљана се издвојува во регионот Адрија  со лансирањето сопствен токен (CUT), кој нуди бенефиции како што се намалени такси, награди за сопствениците и пристап до дополнителна едукативна содржина.

Од самиот почеток платформата успеа да ја стекне довербата на корисниците, а бета-апликацијата сега ја користат повеќе од илјада активни корисници.

Една од клучните предности на „Криптојунити“ лежи во нејзината корисничка поддршка. Нејзиниот тим, кој се состои од 14 експерти од различни области – од развој на софтвер до финансии, работи на тоа да се осигури дека корисниците не се препуштени сами на себе.

Платформата се издвојува и по своите иновации. Таа беше меѓу првите на пазарот што воведе картичка „НФЦ колд волет“ (NFC cold wallet) , која овозможува безбедно складирање на дигитални средства надвор од онлајн околината, намалувајќи го ризикот од кражба или хакирање.

Се разбира, во светот на криптовалутите безбедноста е клучна. „Криптојунити“ може да се пофали со високо ниво на безбедносни мерки, благодарение на соработката со банките и водечките имиња во индустријата за безбедност на криптовалути како „Фајрблокс“. Покрај тоа, платформата е целосно усогласена со регулативите.