Како „Гугл“ ќе одговори на ЧетГПТ? Ќе стави вештачка интелигенција во сè

Вештачката интелигенција требаше да биде посебна карактеристика на „Гугл“ (Google). Компанијата изгради репутација во поглед на правењето долгорочни облози за сите видови технологии што ќе се појават во далечна иднина, а голем дел од истражувањата што го поддржаа тековниот бран на четботови со вештачка интелигенција се одвиваа токму во нејзините лаборатории. Сепак, стартапот „Опен еј-ај“ (OpenAI) се истакна како ран лидер во т.н. генеративна вештачка интелигенција - софтвер кој може да креира сопствен текст, слики или видеа  - преку лансирањето на ЧетГПТ (ChatGPT) во ноември. Неговиот неверојатен успех ја поттикна „Алфабет“ (Alphabet Inc.), матичната компанија на „Гугл“, да се обиде да постигне резултати во технолошката сфера за која извршниот директор Сундар Пичаи рече дека ќе биде „позначајна од огнот и струјата“.

ЧетГПТ, кој некои го гледаат како евентуален предизвикувач на традиционалниот пребарувач Гугл, се чини дека е двојна закана со оглед на блиските врски на „Опен еј-ај“ и „Мајкрософт“ (Microsoft). Чувството дека „Гугл“ можеби заостанува во област која ја смета за ударна сила, доведе до значителна вознемиреност во Маунтин Вју, Калифорнија, според сегашни и поранешни вработени и други луѓе блиски до компанијата, од кои многумина зборуваа под услов да останат анонимни, бидејќи не се овластени јавно да зборуваат за овие прашања. Како што вели еден сегашен вработен: „Постои нездрава комбинација на ненормално високи очекувања и голема несигурност во врска со иницијативата за вештачка интелигенција“.

Поради овие напори Пичаи ги преживува деновите кога работеше како продукт менаџер, бидејќи му се допаѓа директно да ги разгледува деталите за карактеристиките на производот, задача што вообичаено би ја извршувал некој далеку под нивото на неговата плата, според еден поранешен вработен. Лери Пејџ и Сергеј Брин, ко-основачите на „Гугл“, исто така се ангажирани во компанијата повеќе отколку што беа со години наназад, при што Брин дури направи промени во кодот на Бард (Bard), четботот на „Гугл“ сличен на ЧетГПТ. Високото раководство издаде „црвено предупредување“ кое оди заедно со директивата според која сите главни производи  - оние со повеќе од милијарда корисници  - мора да вклучат генеративна вештачка интелигенција во рок од неколку месеци, според лице запознмањено со овие состојби. Во првиот пример за тоа, компанијата во март објави дека креаторите на нејзината видеоплатформа „Јутјуб“ наскоро ќе можат да ја користат технологијата за виртуелна размена на облека.

Некои алумни на „Гугл“ се потсетија на последниот пат кога компанијата поставила внатрешен мандат да внесе нова идеја во секој клучен производ: активностите за промовирање на не толку успешната социјална мрежа Гугл+ (Google+) која започна во 2011 година. Споредбата не е совршена бидејќи „Гугл“ никогаш не беше сметан за  лидер во областа на социјалните мрежи, додека неговата експертиза во областа на вештачката интелигенција е непобитна. Сепак, чувството е слично. Бонусите на вработените некогаш беа поврзани со успехот на Гугл+. Сегашните и поранешните вработени велат дека барем во некои оценки и евалуации на работниците на „Гугл“ веројатно ќе влијае нивната способност да интегрираат генеративна вештачка интелигенција во нивната работа. Црвеното предупредување веќе доведе до десетици планирани интеграции на генеративна вештачка интелигенција. „Се обидуваме да откриеме што функционира“, вели еден вработен во компанијата. „Но, ние не сме ни блиску до она што е потребно за компанијата да се трансформира и да биде конкурентна“.

На крајот, мобилизацијата за примена на Гугл+ не успеа. Социјалната мрежа се бореше да привлече корисници, а „Гугл“ конечно во 2018 година соопшти дека корисниците веќе нема да имаат пристап до производот. Еден поранешен извршен директор на „Гугл“ го гледа тој неуспех како предупредување. „Лари бараше секој производ да има социјална компонента“, вели тој извор. „Целата работа заврши прилично лошо“.

Bloomberg Mercury

Портпаролот на „Гугл“, пак, се бори против споредбите меѓу црвеното предупредување и кампањата за Гугл+. Иако појавата на Гугл+ влијаеше на сите производи, сегашното присуство на вештачка интелигенција во голема мера се состои од охрабрување на вработените во „Гугл“ да ги тестираат алатките за вештачка интелигенција на компанијата внатрешно, практика што портпаролот вели дека е вообичаена во технолошката сфера која се нарекува dogfooding. Повеќето вработени во „Гугл“ не се трудат да минат дополнително време работејќи на вештачка интелигенција и тоа го прават само оние кои работат на релевантни проекти, според портпаролот.

„Гугл“ не е сам во својата увереност дека вештачката интелигенција сега значи сè. Силициумската долина влезе во комплетен циклус што ги претставува сите фази низ кои поминува технологијата, а инвеститорите во ризичен капитал и претприемачите кои одеднаш се декларираа како визионери во областа на вештачката интелигенција сè повеќе се оддалечени од неодамнешните фиксации како што е блокчејн, додека компаниите забележуваат дека цените на нивните акции пораснале по најавите за интеграција на вештачка интелигенција. Во последниве недели, Марк Закерберг, извршен директор на „Мета“ (Meta Platforms Inc), се фокусираше повеќе на вештачката интелигенција, а помалку на метаверзумот  - технологија што неодамна ја прогласи за толку фундаментална за компанијата што иницираше промена на името, според две лица запознаени со ова прашање. 

Некои од луѓето во „Гугл“ со ентузијазам ги дочекаа налозите, бидејќи добро ја знаат историја на компанијата за занимање со шпекулативни истражувања и не многу успешна комерцијализација на истите. Членовите на некои тимови кои веќе работат на проекти за генеративна вештачка интелигенција се надеваат дека сега ќе можат да „испорачаат повеќе и да имаат поголемо влијание врз производите, наместо тоа да биде само истражувачка работа“, веле еден упатен извор.  

На долги патеки, можеби нема многу да значи дека „Опен еј-ај“ доведе до тоа да спласне ентузијазамот во јавната дебата во рок од неколку месеци, со оглед на работата што „Гугл“ веќе ја направи. Пичаи почна да го нарекува „Гугл“ прва компанија за вештачка интелигенција во 2016 година. Таа со години користи машинско учење за својот рекламен бизнис, истовремено вметнувајќи вештачка интелигенција во сите свои производи за широка потрошувачка, како што се „Џимејл“ (Gmail) и „Гугл фотос“ (Google Photos), каде што ја користи технологијата за да им помогне на корисниците да пишуваат е-пошта и да ги организираат своите слики. Во една неодамнешна анализа, компанијата „Зета алфа“ (Zeta Alpha) направи преглед на стоте најцитирани трудови од областа на вештачката интелигенција од 2020 до 2022 година и откри дека „Гугл“ доминира во тоа поле. „На крајот изгледа дека 'Гугл' е еден вид заспан лав кој заостанува и сега се обидува да стигне. Мислам дека реалноста не е баш таква“, вели Амин Ахмад, поранешен истражувач на „Гугл“ за вештачка интелигенција, кој е ко-основач на „Вектара“ (Vectara), стартап кој нуди алатки за разговорно пребарување. „Мислам дека 'Гугл' всушност беше многу добар во имплементацијата на оваа технологија во некои од своите основни производи години пред остатокот од индустријата“.

„Гугл“, исто така, се бореше со несовпаѓање меѓу своите комерцијални приоритети и потребата одговорно да се постапува со новата технологија. Постои добро документирана тенденција автоматизираните алатки да покажуваат недоследности што постојат во збирките на податоци за кои се обучени, а постои и загриженост поради достапноста на алатките за тестирање во јавност пред да бидат подготвени. Генеративната вештачка интелигенција носи ризици поради кои „Гугл“ не брза да ја пласира на пазарот. Во пребарувањето, на пример, четбот може да даде единствен одговор кој изгледа како да доаѓа директно од компанијата што го направила, слично како што се создава впечаток дека ЧетГПТ е гласот на „Опен еј-ај“. Тоа е значително поризичен предлог отколку да се обезбеди листа на линкови до други интернет-страници.

Bloomberg

Се чини дека црвеното предупредување на „Гугл“ ги наруши пресметките на компанијата за ризици и награди на начини што загрижуваат некои експерти во областа. Емили Бендер, професорка по компјутерска лингвистика на Универзитетот во Вашингтон, вели дека „Гугл“ и другите компании кои се премногу брзи во прифаќањето на трендот за генеративна вештачка интелигенција можеби нема да можат да ги насочат своите производи со вештачка интелигенција подалеку од „најневеројатните примери на пристрасност, а камоли сеприсутните, но малку посуптилни случаи.“ Портпаролот вели дека напорите на „Гугл“ се водени од принципите за вештачка интелигенција, збир на упатства објавени во 2018 година за одговорен развој на технологијата, додавајќи дека компанијата продолжува да презема претпазлив пристап.

Други единици веќе покажаа дека се подготвени да одат понатаму, без оглед на „Гугл“. Еден од најважните придонеси на истражувачите на „Гугл“ во оваа област беше влијателниот труд со наслов „Внимание е сè што ти треба“ (анг. Attention Is All You Need) во кој авторите презентираа трансформатори: системи кои им помагаат на моделите со вештачка интелигенција да го насочат целото внимание на најважните поединечни информации во податоците кои ги анализираат. Трансформаторите сега се главни составни делови на големите јазични модели, технологија што ги движи постоечките четботови  - буквата „T“ во ЧетГПТ значи трансформатор. Пет години по објавувањето на трудот, сите освен еден од авторите го напуштија „Гугл“, некои наведувајќи ја желбата да се ослободат од канџите на големата компанија која се движи многу бавно.

Сега тие се меѓу десетиците истражувачи за вештачка интелигенција кои брзо се приклучија на „Опен еј-ај“, како и на голем број помали стартапи, вклучувајќи ги „Карактер еј-ај“ (Character.AI-, „Антропик“ (Anthropic) и „Адепт“ (Adept). Голем број стартапи основани од алумни на „Гугл“  - како што се „Нива“ (Neeva), „Перплексити“ (Perplexity AI), „Тонита“ (Tonita) и „Вектара“ (Vectara)  - се обидуваат одново да го осмислат пребарувањето користејќи големи јазични модели. Фактот дека само неколку клучни места имаат знаење и способност да ги развијат овие модели ја прави конкуренцијата за таленти „многу поинтензивна отколку во други области каде моделите за обука не се толку специјализирани“, вели Сара Хукер, алумни на „Гугл брејн“ (Google Brain) која сега работи во стартапот за вештачка интелигенција „Кохир“ (Cohere Inc).

Не е невообичаено луѓе или организации значително да придонесат за развојот на една или друга револуционерна технологија, а на крајот да бидат сведоци како некој друг остварува огромни финансиски придобивки од истата. Кевал Десаи, поранешен вработен во „Гугл“, кој сега работи како директор на компанијата „Шакти“ (Shakti), во која е вложен ризичен капитал, го наведува примерот на „Ксерокс парк“ (Xerox Parc), истражувачка лабораторија која ги постави основите за голем дел од ерата на персоналните компјутери, за на крајот „Епл“ и „Мајкрософт“ да изградат империи вредни билиони, токму на нејзиниот грб. „Гугл не сака да биде 'Ксерокс парк' на своето време“, вели Десаи. „Во таа компанија се случија сите иновации, но не беа спроведени на дело“.

Во моментов нема коментари за веста. Биди прв да коментира...

Остави коментар