.webp){kind=icon}
Вештачката интелигенција во почетокот на годинава почна да привлекува сè поголемо внимание кај јавноста, а со тоа и кај голем број инвеститори. Многу аналитичари веќе навестија дека оваа година би можела да ја обележи токму вештачката интелигенција, а со појавата и популарноста на четботот ЧетГПТ (ChatGPT) се чини дека тоа се оствари. Се предвидува дека ваквите „зборливи“ роботи, кои разбираат човечки јазик и знаат детално да одговорат на прашањата, во иднина ќе ги заменат луѓето во многу сегменти. Во продолжение, ова е преглед на криптовалутите и компаниите од S&P 500 што ставија силен фокус на вештачката интелигенција.
Според една од многуте дефиниции, вештачката интелигенција (ВИ/AI) е компјутерска област што ја развива способноста на компјутерите да се снаоѓаат во нови ситуации, да учат нови концепти, да донесуваат заклучоци, да разбираат природен јазик, да препознаваат сцени и слично. Имајќи го на ум сето тоа, вештачката интелигенција може да се примени во различни сектори и индустрии. На пример, во медицината може да се користи за прецизно дозирање терапии, откривање болести во рана фаза и определување терапија. Во електрониката, во развојот на автономни автомобили, во модерното банкарство, при што неправилностите и обидите за измама може да се откријат токму со помош на вештачката интелигенција.
Вештачката интелигенција веќе е широко користена. Интегрирана е во интернет-пребарувачите како „Гугл“ (Google Search), со нејзина помош „Јутјуб“ (YouTube) и „Нетфликс“ (Netflix) генерираат препорачани содржини, виртуелните асистенти Сири (Siri) и Алекса (Alexa) функционираат користејќи ја, а компјутерските противници во шах ги прават своите потези прецизно водени од вештачка интелигенција.
Илон Маск, основачот на компанијата „Неуралинк“ (Neuralink), која вработува врвни невролози, многупати зборувал за вештачката интелигенција, а меѓу другото има изјавено дека „вештачката интелегенција преплашува до смрт“ и дека „е способна за многу повеќе отколку што некој во моментот претпоставува, со можност за експоненцијална стапка на раст и напредок“.
Инвеститорите во акции и криптовалути посветија внимание, но и свои средства во вештачката интелигенција. Многу светски компании инвестираат сè повеќе и повеќе во развојот на оваа технологија. Исто така, постојат многу криптопроекти што имплементираат вештачка интелигенција во својот блокчејн.
Листа на компании што инвестираат во развој на вештачка интелигенција:
1. „Мајкрософт“ / Microsoft (MSFT)
Техничкиот гигант „Мајкрософт“ инвестираше милијарда долари во „Опен еј-ај“ (OpenAI) во 2019 година, кога компанијата одлучи да го направи „Опен еј-ај“ ексклузивен провајдер на облак-услуги на „Мајкрософт азур“ (Microsoft Azure). „Мајкрософт“ во почетокот на годинава објави дека влегол во третата фаза на соработка со компанијата „Опен еј-ај“ и дека потпишале договор вреден неколку милијарди долари. Иако не прецизираа конкретна сума, во извештајот објавен од „Семафор“ (Semafor) во јануари беше наведено дека „Мајкрософт“ се подготвува да инвестира дополнителни десет милијарди долари во „Опен еј-ај“. Се проценува дека „Опен еј-ај“ ќе достигне милијарда долари приход во 2024 година благодарение на успехот на ЧетГПТ и другите технологии што ги произведе.
2. „Алфабет“ / Alphabet (GOOG, GOOGL)
Пребарувачот „Гугл“, „Џимејл“ (Gmail) и видеосервисот „Јутјуб“ користат вештачка интелигенција во своето секојдневно функционирање - од спонзорирање објави до филтрирање спам за е-пошта. „Алфабет“, чадор-компанијата под која работи „Гугл“, ги поседува и британската компанија за вештачка интелигенција „Дипмајнд“ (DeepMind) и компанијата за развој на автономни возила „Вејмо“ (Waymo), кои испишаа историја во 2020 година со лансирање на првата комерцијална такси-услуга без возач на јавните улици. Компанијата развива и сопствен четбот Бард (Bard), кој наскоро треба да се интегрира во интернет-пребарувачот „Гугл“, слично како што „Мајкрософт“ го стави ЧетГПТ во својот пребарувач „Бинг“ (Bing) на пробна работа.
3. „Амазон“ / Amazon (AMZN)
„Амазон“ ја користи вештачката интелигенција во сите аспекти на својот бизнис, од насочено рекламирање, алгоритми за пребарување до облак-услуги. Виртуелниот асистент Алекса (Alexa) е еден од симболите на „Амазон“ и се користи во многу домаќинства во САД. „Амазон“ нуди и широк спектар на услуги за вештачка интелигенција во облакот AWS, вклучувајќи напредна текстуална аналитика, автоматизирани прегледи на кодови и четботови. Во ноември „Амазон“ ја претстави својата нова роботска рака за складирање, „Спероу“ (Sparrow), која користи компјутерски вид и вештачка интелигенција и е способна да преместува производи со различни големини пред пакувањето.
4. „Енвидија“ / Nvidia (NVDA)
Технолошки гигант, еден од лидерите во производството на микрочипови и графички картички потребни за обезбедување и развој на услуги за вештачка интелигенција. „Мета“ (Meta) го конструира најголемиот суперкомпјутер во светот базиран на вештачка интелигенција, кој ќе функционира со графички картички на „Енвидија“. Од почетокот на годината акциите на „Енвидија“ постигнаа голем раст. Од почетните 143,15 долари, заклучно со петокот достигна 213,88 долари, што е раст од 49,41 отсто за помалку од два месеца.
5. „Сејлсфорс“ / Salesforce (CRM)
Компанијата „Сејлсфорс“ е позната по облак-услугите и поврзувањето апликации, корпорации и корисници. Во основата на овие услуги е вештачката интелигенција. На пример, „Сејлсфорс“ нуди информации поврзани со продажни и маркетинг-услуги врз основа на анализа од вештачка интелигенција. Заработката по акција (EPS) за време на кризната 2022 година беше надминувана секој квартал.
Криптовалути што користат вештачка интелигенција:
1. „Граф“ / The Graph (GRT)
Оваа криптовалута моментално е рангирана на 40-то место според „Коин маркет кап“ (CoinMarketCap) и има пазарна капитализација од 1,56 милијарда долари. Нејзината моментална цена е 0,177 долари. „Граф“ е протокол за индексирање податоци од блокчејнот на сличен начин како што „Гугл“ повлекува податоци од други веб-локации. Затоа, некои го поистоветуваат со „Гугл“. „Граф“ има цел да ги организира податоците во помали графикони.
2. „Сингуларити НЕТ“ / SingularityNET (AGIX)
Според „Коин маркет кап“, криптовалутата „Сингуларити НЕТ“ е рангирана на 86-то место, со цена од 0,41 долар. Пазарната капитализација на овој токен брзо скокна од почетокот на годината и моментално изнесува 503 милиони долари. „Сингуларити НЕТ“ е блокчејн-платформа што им овозможува на корисниците да создаваат и споделуваат услуги за вештачка интелигенција. Истовремено, има и сопствена платформа, каде што корисниците можат да плаќаат за услуги за вештачка интелигенција со изворните токени - AGIX.
3. „Оушн протокол“ / Ocean Protocol (OCEAN)
Пазарната капитализација на криптовалутата „Оушн протокол“ сега изнесува 293 милиони долари. Цената на токенот е 0,47 долари и се наоѓа на 135-то место во рангирањето на „Коин маркет кап“. Платформата „Оушн протокол“ се заснова на блокчејнот на „Етерум“ (Ethereum) и им овозможува на компаниите и поединците да разменуваат и монетизираат податоци и услуги врз основа на анализа на податоци.
Precedence Research
Глобалниот пазар за вештачка интелигенција расте. Според процените на „Преседенс рирч“ (Precedence Research), пазарот сега вреди околу 164 милијарди долари, а до 2030 година се очекува вредноста да скокне на 1,59 билион долари.
Оградување: Наведените акции и криптовалути не се предлог за купување, а содржината што е претставена не е финансиски совет.
