ВИ-алатки ви штедат време и го намалуваат стресот - што користат менаџерите

Сѐ уште ми одѕвонуваат во главата зборовите на македонскиот претприемач Петар Ниновски, основач на едукативно–технолошката платформа „Бреинстер“ (Brainster), кажани на една презентација неодамна: „Вештачката интелигенција (ВИ) нема да ги замени луѓето, туку луѓето со ВИ-вештини ќе ги заменат луѓето без ВИ-вештини“. Настанот беше токму околу иднината на професиите во ерата на ВИ, односно како ВИ ќе ги трансформира работните места. Многумина периодов се преокупирани со прашањето дали во блиска иднина е можно да бидат сосема заменети од „роботите“, односно ВИ, а ако се прашува Ниновски, сите треба да размислуваме на таа тема, затоа што бројот на работни позиции што делумно или целосно веќе може да ги извршува ВИ, секојдневно расте. 

„Меѓутоа, не треба веднаш да паничиме, затоа што не мора да ни се случи најцрното сценарио, односно да останеме без работа поради ВИ, доколку научиме како да ја користиме, односно да соработуваме со неа. Оние што ќе почнат да се подготвуваат за промените навреме, ќе имаат најголема корист од нив и токму сега е моментот да се почне со учење и адаптирање на новите технологии, за да бидеме конкурентни на пазарот на трудот во иднина. Раната подготовка ќе овозможи поефикасно искористување на новите можности што ќе ги донесе ВИ“, порача Ниновски. 

Тој и самиот, инаку, веќе на големо користи ВИ-алатки што му го олеснуваат секојдневното работење и го прават попродуктивен. 

Една е Суперхјуман (Superhuman), дигитална алатка што е спас за оние што се справуваат со стотици електронски мејлови дневно. Бидејќи често се губиме во морето од мејлови, не знаеме кои се приоритетни, се мачиме понекогаш да составиме соодветен одговор и сл., „суперчовекот“ е идеално решение. Ви помага да ги сортирате мејловите по категории (службени, приватни, итни, не толку итни итн.), побрзо да составите одговор, да споделите документи со вашиот тим, ви става потсетници и мноштво други погодности. „Кога ќе сфатите дека дневно може да изгубите по два-три часа само за справувањето со мејлови, пресметајте колку часови месечно и годишно ви заштедува алатката и што сѐ може да направите со тоа време“, вели Ниновски. 

Игор Маџов, човек што го познавам долго време, со години ангажиран во развојот на домашниот стартап-екосистем, соосновач на „Стартап Македонија“, страстен за иновации и дигитализација, со „Блумберг Адрија“ сподели дека користи цела низа на ВИ-алатки за различни потреби.

„Користам ЧетГПТ 4.0 (ChatGPT 4.0) платена верзија за секакви активности, истражување, бреинсторминг, концепти за предавања, превод на содржини на различни јазици итн. Постојат голем број алатки во библиотеката на самата апликација што ги користам за анализи на документи за инвестиции, проверка на конкуренција и сл. Грамарли (Gramarly), пак, ми е особено корисна бидејќи 70 отсто од комуникацијата ми е на англиски и многу ми олеснува во инстант комуникацијата и пишувањето мејлови. Ноушн (Notion.ai) е алатка за продуктивност, менаџирање време/задачи и проектен менаџмент, идеална за мали тимови. Батерфлајс (Butterflies.ai) е алатка што се приклучува на видеоповици и прави транскрипција на целиот разговор, додека апликацијата Рингон (Ringon) овозможува виртуелни канцеларии и асистенти достапни преку телефонски број на македонски и сто други јазици“.

Маџов, кој е и соосновач и на неколку стартапи, инвеститор и ментор, вели дека сите овие алатки му заштедуваат минимум по два часа на ден, а заменуваат барем еден вработен и експертиза, за да не мора да зависите од надворешни консултанти.

Како да се вратите од одмор на работа без нагон за повраќање

Преполното сандаче за електронска пошта и обврските што се трупаат им прават стрес на менаџерите и кога се на одмор, а не само во канцеларија. Токму затоа и голем дел менаџери низ светот неволно користат одмор или слободни денови, затоа што знаат каков пекол ги чека „на бирото“ кога ќе се вратат. Една од нив е и Линдзи Скрејс, која неодамна решила да проба со помош на ВИ да го избегне таквиот стрес, пишува „Блумберг бизнисвик“. Извршната директорка за операции во „Чекар“ (Checkr Inc.), компанија од Сан Франциско за проверка на работни биографии, за своето неодамнешно патување во Јапонија се подготвила користејќи неколку ВИ-алатки, како Слек (Slack), Копајлот (Copilot) и слични, кои ѝ ги сумирале мејл-комуникацијата на колегите, пропуштените повици, одржаните дискусии итн., што ѝ помогнало побрзо да влезе во ритам откако се вратила. ВИ-алатките се покажале и како паметен асистент и надвор од канцеларија, бидејќи ѝ испланирале дури и делови од патувањето, вклучувајќи го и тоа на која страна од возот да седи за најубав поглед на планината Фуџи. 

Не толку одамна повеќето канцелариски работници можеа да заминат на одмор без да се плашат од е-поштата што ќе ги чека по враќањето - прво затоа што порано пораките не беа достапни на сите телефони, а подоцна затоа што работното време од 9 до 5 беше појасно дефинирано. Но денешната култура на постојана вклученост - засилена од порастот на работата од далечина - ги избриша тие граници. Сега сè поголем број компании нудат алатки што им овозможуваат на зафатените менаџери и вработени да се вратат во тек брзо. Копајлот на „Мајкрософт“, една од најпознатите вакви алатки, чини 30 долари месечно, додека Џемини (Gemini) на „Гугл“ и Рово (Rovo) на „Атлеијжн“ (Atlassian) се вклучени во претплатите за бизнис-корисници; последниов сега има 1,5 милион корисници месечно, што е раст од 50 отсто во споредба со претходниот квартал, според „Блумберг бизнисвик“.

„Една од пречките за да се земе одмор е тоа што не сакаш да пропуштиш нешто или да бидеш пречка во процесите“, вели Мелани Розенвасер, директорка за човечки ресурси во „Дропбокс“ (Dropbox Inc.), апликација што, покрај складирањето податоци, сега нуди и алатки со вештачка интелигенција, вклучувајќи и за враќање по одмор. „Овие алатки ја отстрануваат таа вина“. 

Bloomberg

 

Во моментов нема коментари за веста. Биди прв да коментира...

Остави коментар