.webp){kind=icon}
Директорот и косопственик на „Нген“ (Ngen), Роман Бернард, изгради водечка платформа во регионот за управување со батерии за електрична енергија што работи на сопствено софтверско решение. Во екот на енергетската криза, ваквата приказна станува стратегиски и економски важна и за Словенија и за ЕУ. Во октомври 2022 година, компанијата вложи 16 милиони евра во третото батериско складиште на електрична енергија, кое се смета за едно од најголемите во Европа, во делот на деловната зона на компанијата „Талум“ во Кидричево.
Приказната е интересна не само поради складиштата на електрична енергија на „Тесла“ туку и затоа што во таа приказна влегуваат словенечки милионери. Во 2019 година, „Нген“ заедно со Бернард го основа еден од најбогатите Словенци, Дамиан Мерлак, инаку сериски претприемач и коосновач на криптоменувачницата „Битстамп“ (Bitstamp). Лани им се придружи уште еден словенечки милионер - Боштјан Бандељ, коосновач на компанијата „Белектрон“ (Belektron) за тргување со купони за емисии - со влог од 70 милиони евра за 33 отсто од акциите. Со тоа компанијата беше проценета на нешто повеќе од 212,1 милиони евра.
Сопственоста на „Нген“ е поделена на три дела, што значи дека уделот на Бернард вреди околу 70 милиони евра. Бернард се води од тезата дека секоја домашна електроцентрала треба да биде опремена и со сопствено складиште. „Батеријата што ја имате дома со соларна централа - или дури и без неа - е вашето складиште за енергија, вашата приказна“, рече тој во интервју за „Сиол“ (Siol.net). Како што објасни, батеријата во текот на денот го складира вишокот на енергија, а ноќе ја враќа во системот, така што корисникот не мора да купува електрична енергија од системот. „Новите електроцентрали без складиште се предизвик, па дури и оптоварување за енергетскиот систем“, нагласува Бернард, кој има амбициозни планови. Предминатата година, на пример, најави иницијална јавна понуда на акции што треба да се реализира во следните две години, иако сѐ уште не е донесена одлука на која берза.
