.webp){kind=icon}
Меѓународната поморска организација, агенција на Обединетите нации одговорна за безбедноста на глобалното поморство и спречување на загадувањето од индустријата, ги ревидира упатствата за комерцијалните бродови од 2014 година, со цел да се намали подводниот шум што им се заканува на некои морски видови.
Меѓу организациите кои се залагаа за промени е групата што ги претставува заедниците на Инуитите во Канада, САД, Гренланд и Чукотка, автономна област во Русија, која побара поголема заштита на морските животни од кои зависи нивната егзистенција и култура. Нацрт-ревизиите, кои сè уште треба да бидат одобрени од Комитетот за заштита на морската средина ова лето, вклучуваат повеќекратни референци за татковината на Инуитите. За прв пат, тие ја препознаваат и важноста на домородните знаења во мерењето на ефектите на бучавата од превозот врз животната средина.
Bloomberg Mercury
„Излеговме од состаноците навистина охрабрени. Иако здружението не успеа да вметне специфичен анекс за Арктикот во ревидираните упатства, сепак ова е прекрасен чекор напред“, рече Лиза Коперквалук, претседателка на Инуитскиот совет, кој се заложи за построги мерки за намалување на подводната бучава на Арктикот.
Научниците се' повеќе ја истакнуваат важноста на експертизата на Инуитите кога се обидуваат да ги измерат ефектите од развојот на живеалиштата на Арктикот. Климатските промени го отвораат глобалниот Арктик за поголем поморски сообраќај, донесувајќи економски можности за некои домородни заедници, но создавајќи и нови ризици.
Како што пристигнуваат повеќе бродови, Инуитите се сведоци на промени во однесувањето на животните, вклучително и миграција и модели на репродукција. Некои морски видови, на пример, прстенестата фока и нарвалот, се од особено значење за арктичките заедници. Ревидираните упатства ги детализираат најдобрите практики за комерцијалните бродови за намалување на бучавата, вклучително и оптимизирање на дизајнот на пропелерот и трупот, намалување на брзината, прилагодување на рутите за минимизирање на патувањето низ чувствителните области и соодветно одржување. Иако тие се однесуваат на глобалното поморство, ревизиите го забележуваат потенцијалот да бидат погодени видовите чувствителни на бучава на Арктикот, заедно со Инуитите кои живеат таму.
„Дополнителни напори за намалување на влијанијата врз морските диви животни се препорачливи за бродовите што оперираат во овие области, вклучително особено внимание на намалувањето на влијанието на бучавата од кршењето на мразот и имплементација на оперативни пристапи и мониторинг“, се вели во ревидираните упатства.
Тивките води на Арктикот во татковината на Инуитите се природно уште потивки од оние во другите делови на светот и звуците може да патуваат подалеку од причини кои вклучуваат температура, плиткост на морското дно и променлив соленост, тврди Советот во својот поднесок. Во меѓувреме, мразокршачите и бродовите способни да го поминат регионот најверојатно ќе бидат побучни.
Бучното загадување од бродовите се зголемило повеќе од двојно во некои делови на Арктикот во периодот помеѓу 2013 и 2019 година, покажува извештајот на Заштита на арктичката морска средина (ПАМЕ). Некои арктички морски животни можеби развиле подобар слух за да се движат под густ мраз, отколку нивните роднини на друго место.
„Подводниот шум во некои делови на Арктикот е веќе на нивоа кои веројатно ги попречуваат способностите на китовите, фоките и моржот да комуницираат и да користат звук и може да влијае на други морски животни. Како што морскиот мраз продолжува да се намалува, превозот и подводниот шум ќе растат“, се забележува во извештајот.
Советот на Инуитите расправаше и за задолжителни, а не за доброволни правила, иако упатствата остануваат необврзувачки. Ризикот зголемениот транспорт на железна руда да го наруши природното однесување беше главната грижа на Инуитите во Канада, кои успешно се спротивставија на големиот предлог минатата година за проширување на рударството од страна на рудниците за железо „Бафинланд“.
