.webp){kind=icon}
Свети Валентајн одамна не е само симбол и ден посветен на вљубените, туку период од годината кога одредени индустрии сериозно печалат од вљубените. Секоја година на 14 февруари светот троши милијарди и милијарди за подароци... Безброј цвеќиња, парфеми, балончиња, кадифени мечиња, но и многу поскапи производи се даваат, односно добиваат како подарок. Неизоставен дел се и чоколадните задоволства.
Според статистиката на „Еуримонитор интернешнел“ (Euromonitor International), лани само во Западна Европа, каде што е најголема продажбата на чоколади во периодот пред и на самиот ден на овој празник, се потрошиле речиси седум милијарди американски долари само за чоколади. Предводници се Франција, Германија и Обединетото Кралство. Зад овие бројки не изостануваат многу ниту Соединетите Американски Држави (САД), каде што лани вредноста на продадени чоколади била нешто под четири милијарди долари, а годинава се очекува да се зголеми за 8,6 проценти и да ја надмине границата од четири милијарди долари.
Според податоците на „Еуримонитор интернешнел“, најпопуларни сезонски брендови за чоколадо на глобално ниво се „Линдт“ (Lindt), „Хершис“ (Hershey’s) и „Рисис“ (Reese’s). Во комбинација, тие сочинуваат околу 19 отсто од глобалниот сезонски пазар на чоколади. А бројот на слатките задоволства за Денот на вљубените (чоколади, лижалчиња итн.) во јануари годинава порасна за повеќе од 50 проценти во споредба со јануари 2022 година.
„Сезонската продажба на чоколадо во облик на срце за Денот на вљубените се очекува да биде клучна категорија што ќе го поттикне растот на чоколадните кондиторски производи оваа година. Очекуваме висок едноцифрен раст и сезонската продажба на чоколадо да надмине четири милијарди американски долари само во САД“, вели Карл Куаш, раководител на секторот за пакување храна и закуски во „Еуримонитор интернешнел“.
Нивната годишна анкета покажува дека за животниот стил еден од секои четири потрошувачи сака да троши повеќе на нови искуства.
„Со тоа ќе видиме дека брендовите на грицки ги прошируваат асортиманите и им нудат на потрошувачите возбудливи начини да ја поддржат нивната љубов кон грицките.
Минатогодишните празнични иновации беа делумно дефинирани со континуираните ограничувања на синџирот на снабдување, високите трошоци и брендовите што повторно проценуваа кои производи треба да го преземат производството и да се појават на полиците. Оваа година, гледајќи го само месецот пред празникот, бројот на слатки задоволства за Денот на вљубените забележани преку ’Виа’, нашата онлајн база на податоци за производи, покажува раст од повеќе од 50 проценти во однос на јануари 2022 година. Гледаме позитивни сигнали дека производителите на грицки може да настојуваат да инвестираат повеќе во сезонските можности, а тоа е особено потребно, бидејќи очекувањата на потрошувачите се зголемени“, вели Куаш.
Најголем број вљубени организираат романтична вечер дома или надвор
Според „Статиста“ (www.statista.com), вкупната потрошувачка за Денот на вљубените во САД само за цвеќиња во просек изнесува 2,3 милијарди долари.
Истражувањето на „Статиста“, спроведено онлајн меѓу 7.112 испитаници во светот, на возраст од 16 до 74 години, покажува дека лани најголемиот дел, или 41 отсто од нив имале романтична вечера дома, додека 35 проценти од испитаниците организирале романтична вечер во ресторан, на кино, театар, концерт и друго.
Една третина, или 34 отсто од испитаниците одговориле дека подариле чоколади или слатки, додека 28 проценти купиле цвеќе. Секој петти испитаник подарил и парфем.
За разлика од тие што обрнуваат особено внимание на Денот на вљубените, има и такви со спротивни ставови, кои мора да се признае дека се малкумина. Само четири проценти од испитаниците рекле дека не планираат ништо посебно на овој ден.
Во Македонија е најевтино да се оди на вечера споредено со регионот
Според податоците од „Нумбео“ (www.numbeo.com), кај нас најевтино ќе поминете на ручек или вечера. Имено, во Македонија просечната цена за двајца во ресторан од средна класа за предјадење, главно јадење и десерт би била околу 20 евра, што ја прави земјава најисплатлива за организирање средба во ресторан.
За нијанса поскапи се рестораните во Босна и Херцеговина, додека најскапо е ако резервирате вечера во Грција, Словенија или Хрватска, каде што за таа намена ќе треба да одвоите околу 40 евра, или двојно повеќе отколку во Македонија.
Британците за пет години двојно ја зголемиле потрошувачката за Денот на вљубените
Интересна е статистиката кај Британците, кои само за пет години двојно го зголемиле трошокот за подароци за Денот на вљубените. Податоците покажуваат дека во 2018 година Британците потрошиле вкупно речиси 760 милиони долари, додека лани износот се удвоил на 1,66 милијарда долари.
