.webp){kind=icon}
Германија планира да забрани во земјата некои кинески компоненти во безжичната мрежа од петтата генерација, објави весникот „Цајт“ (Zeit), бидејќи засилените геополитички тензии ги туркаат пратениците да го поништат компромисот од времето на канцеларката Ангела Меркел.
На операторите ќе им биде забрането да користат одредени делови произведени од „Хуавеј“ (Huawei Technologies Co) и ЗТЕ (ZTE Corp), соопшти „Цајт“, цитирајќи анонимни извори од владата.
Портпаролите на германската влада, како и на двете споменати компании, не одговорија веднаш на барањата за коментар.
Берлин зазема поцврст став за критичната мрежна инфраструктура, откако владата минатиот месец рече дека не знае колку е распространета кинеската опрема во нејзините мобилни системи. Овој потег доаѓа откако САД ги разгледуваат постојните лиценци за извоз на производи во „Хуавеј“ поради загриженост за националната безбедност.
САД, Обединетото Кралство и Европската Унија (ЕУ) сè повеќе се фокусираат на безбедносните ризици што ги претставуваат кинеските компании. Европската комисија минатиот месец забрани на персоналот да користи Тикток (TikTok) на официјалните службени телефони, откако претходно, односно минатата година, американскиот Конгрес ја ограничи употребата на апликацијата на федералните уреди.
За разлика од многу земји од ЕУ, соочени со американскиот притисок да ги исклучи кинеските доставувачи на инфраструктура, Германија првично избегна целосна забрана на 5Г технологијата на „Хуавеј“. Наместо тоа, владата одлучи дека сите компоненти за 5Г мрежата што се сметаат за критична ИТ-инфраструктура треба да бидат сертифицирани од властите. Одлуката за забрана на некои компоненти доаѓа откако почна постојано да се зголемува притисокот врз Берлин да дејствува.
Во ноември шефицата за конкуренција на ЕУ, Маргрет Фештагер, рече дека земјите треба постепено да ја укинат употребата на високоризични доставувачи на 5Г.
САД ги предводеа напорите, кои датираат од администрацијата на Трамп, да се ограничи досегот на „Хуавеј“ врз основа на безбедносни причини. Компанијата веќе е предмет на американски трговски ограничувања и група сенатори, вклучувајќи го и лидерот на мнозинството Чак Шумер, предложија легислатива што може да го прекине нејзиниот пристап до американското финансирање.
Земјите од ЕУ, вклучувајќи ги Шведска, Бугарија и Грција, ја ограничија улогата на „Хуавеј“ во својата 5Г инфраструктура. Но „кутијата со алатки“ на блокот, која им овозможува на земјите да престанат да користат услуги и производи од ризични доставувачи, е необврзувачка и им овозможува на земјите и бизнисите да поставуваат своја политика.
