.webp){kind=icon}
Лидерите на најразвиените земји во светот постигнаа договор за забрзување на намалувањето на употребата на фосилни горива, но не успеаја да се договорат за краен рок за целосно напуштање на јагленот.
Во исто време, групата Г7 ја остави отворена вратата за нови инвестиции во природен гас.
Во соопштението за печатот по состанокот на министрите за енергетика и животна средина во северниот јапонски град Сапоро, се наведува дека целта на забрзаното намалување на употребата на фосилните горива е декарбонизација и нулта нето емисии на јаглеродни гасови во енергетскиот сектор до 2050 година.
Пораката на Г7 е исто така важна за глобалната агенда на разговори за енергетските и климатските цели, но отсуството на договор за јаглен може да ја ослабне глобалната решителност пред следниот светски самит за климата што го организираат Обединетите нации подоцна годинава во Дубаи. На тој собир се очекува силен притисок за напуштање на фосилните горива.
Документот од Сапоро, исто така, дозволува нови инвестиции во природен гас како одговор на можните недостатоци на пазарот, доколку тоа е во согласност со климатските цели. Сепак, еколошките активисти сметаат дека ова е чекор назад во однос на намерите искажани минатата година да се прекине јавната поддршка за ваквите инвестиции, освен во конкретни ситуации, па дури и тогаш само доколку тие се во согласност со целта за максимално глобално затоплување од 1,5 Целзиусови степени до крајот на векот.
Според француската министерка Ањес Паније-Рунаше, договорот имплицитно подразбира отсуство на инвестиции во истражување на нови резерви на гас.
Г7, исто така, повика на забрзување на инсталацијата на постројки засновани на обновливи извори. Целта на најразвиените земји е до крајот на оваа деценија да го зголемат капацитетот на соларните електрани на повеќе од 1.000 гигавати и на крајбрежните ветерни електрани на 150 гигавати.
Тоа би требало тројно да го зголеми соларниот капацитет од 2021 година, а седумкратно капацитетот од морскиот ветер.
Сепак, ова не се никакви новопоставени цели, предупреди Марија Пастухова од енергетскиот тинк-тенк E3G.
