.webp){kind=icon}
Банката „ЏП Морган Чејс“ (JPMorgan Chase & Co.) е подготвена да плати 290 милиони долари за да го реши судскиот спор во кој се тврди дека свесно имала корист од сексуалната трговија на поранешниот клиент Џефри Епштајн, информира лице запознаено со ова прашање.
Фирмата постигна првичен договор за решавање на предложената колективна тужба, која ја поднесе неименувана жртва на Епштајн кон крајот на минатата година, се наведува во денешното соопштение на „ЏП Морган“.
„Сите ние сега разбираме дека однесувањето на Епштајн беше монструозно и веруваме дека оваа спогодба е во најдобар интерес за сите страни, особено за преживеаните, кои претрпеа незамислива злоупотреба од страна на овој човек“, соопшти банката со седиште во Њујорк.
„Секоја поврзаност со него беше грешка и жалиме поради тоа. Никогаш немаше да продолжиме да работиме со него ако верувавме дека ја користи нашата банка на кој било начин за да изврши грозоморни злосторства“, додаваат од банката.
„Њујорк тајмс“ претходно веќе ја објави сумата на спогодбата. Договорот со жртвата, идентификувана само како Џејн До, не ја завршува правната главоболка на „ЏП Морган“. Поради нејзината поврзаност со Епштајн, сè уште се соочува со тужба и од Американските Девствени Острови, каде што финансиерот имал приватен имот и каде што однел неколку од своите жртви.
Банката исто така води и сопствен случај против поранешниот раководител за приватно банкарство Џес Стејли, за кого „ЏП Морган“ смета дека треба да биде одговорен за штетите претрпени поради врските со Епштајн.
„Гледано групно или поединечно, историскиот надомест од банката што му нудела финансиски услуги на Џефри Епштајн говори сам за себе. Беше потребно многу време, можеби предолго, но денес е одличен ден за преживеаните од Џефри Епштајн и голем ден за правдата“, рече Дејвид Бојс, еден од адвокатите на жртвата До.
До во ноември поднесе предложена групна тужба против „ЏП Морган“, чиј клиент беше Епштајн во периодот од 1998 до 2013 година. Друг тужител, застапуван од истите адвокати, истовремено ја тужеше „Дојче банк“ (Deutsche Bank AG). Германската банка, која стана главна финансиска институција на Епштајн откако „ЏП Морган“ ја прекина соработката со него во 2013 година, минатиот месец се согласи на надомест за тужбата во износ од 75 милиони долари.
И До и Девствените Острови ги тужат банките дека затворале очи на знаците дека Епштајн ги користи своите сметки за трговија со млади жени. Наводно, Епштајн префрлил стотина милиони долари преку најмалку 55 сметки.
Епштајн умре во 2019 година во затвор, соочувајќи се со обвинение за трговија со жени, а официјално причина за неговата смрт е самоубиство.
