.webp){kind=icon}
Додека Скопје деновиве се дави во ѓубре поради штрајкот на вработените во „Комунална хигиена“, а политичките партии, општините и Град Скопје се расправаат кој е виновен за преполнетите контејнери, светот е преокупиран со многу поважни прашања, како на пример како да се трансформира системот за снабдување со храна кој во ваква форма наскоро нема да ги задоволи потребите на населението во светот.
Добро утро, ова се петте вести што ги издвоивме за почеток на денот.
Историски рекорд на македонските девизни резерви
На крајот на јуни 2023 година, официјалните девизни резерви изнесуваат 4,18 милијарди евра и во однос на претходниот месец бележат зголемување за 15 милиони евра, покажуваат новите податоци на Народната банка. Всушност, статистиката на централната банка открива дека тие се на рекордно високо ниво и дека се неколку пати зголемени во однос на почетокот на овој век.
Блумберг Адрија
Најголем дел од девизните резерви се пласирани во хартии од вредност (65,9 проценти), по што следуваат валутите и депозитите (24,9 проценти) и монетарното злато (9,2 проценти).Народната банка во последниот јунски извештај за макроекономските показатели соопшти дека анализата на показателите на адекватноста на девизните резерви покажува дека тие и понатаму се во сигурната зона.
Прехранбениот систем се менува: Што значи тоа за инвеститорите?
Глобалните промени во приходите и бројот на населението, геополитиката и климатските промени во комбинација драстично ја менуваат перспективата за снабдувањето со храна во светот. Тајмур Хајат, главен оперативен директор во „ПГИМ“ (PGIM), се приклучи на подкастот „Уат гоус ап“ (What Goes Up) за да зборува за неговиот истражувачки труд: „Храна за мисла: можности за инвестирање низ променливиот систем за храна“.
„Причините поради кои како ПГИМ влеговме во ова беа неколку. Како прво, храната не е само 10 проценти од БДП, туку 40 проценти од работната сила, така што многу луѓе работат во оваа индустрија. Ние дефинираме како храната од фарма стигнува до вилушка и сè помеѓу - преработка, пакување, подготовка на семиња, па сè до крајна малопродажба“, вели Хајат.
ЕЦБ е при крај со затегнувањето, но каматите ќе останат високи
Европската централна банка e при крај со зголемувањето на каматните стапки, но потоа ќе ги задржи на „високо ниво“ за да се осигура дека тие ќе имаат влијание врз економијата, рече членот на Управниот совет Франсоа Вилерој де Галу. Рекордниот циклус на затегнување на ЕЦБ ќе ја доведе инфлацијата до целта од 2 отсто до 2025 година, рече гувернерот на Банката на Франција. „Растот на цените во Франција веќе го помина својот врв, забавувајќи се на 5,3 провценти од над 7 проценти претходно оваа година“, додаде тој.
Коментарите на францускиот централен банкар претходат на одлуката на 27 јули, за која е сигурно дека ќе донесе зголемување на каматната стапка за четвртина поен. Креаторите на политиките дебатираат дали повторно да ги зголемат трошоците за задолжување на нивниот следен состанок во септември
Советот на странски инвеститори не сака ад хок закон за данок на солидарност
Советот на странски инвеститори ја поддржува иницијативата со која се бара запирање на постапката за донесување на предлогот на Законот за данок на солидарност, која на транспарентен начин е поддржана и потпишана од органите на Комората, во која членуваат и компании од странските инвеститори во нашата држава, соопштија од Советот.
„Како странски инвеститори во нашата држава, со големо влијание врз создавањето на БДП, вработувањата и врз извозот, повикуваме на запирање на постапката за донесување на предлогот на Законот за данок на солидарност, бидејќи се носи ад хок во втората половина на деловната 2024 година за оданочување на добивката остварена во 2022 година“, велат од Советот.
Саудијците сакале да го зголемат влогот во „Кредит Суис“ пред да колабира
Најголемиот акционер во „Кредит Суис“ (Credit Suisse), „Саудиската национална банка“ сакала да го зголеми својот удел во сопственоста во швајцарската банка на 40 проценти пред нејзиниот колапс во март годинава, објави швајцарскиот весник „Блик“ (Blick).
Претставници на „Саудиската национална банка“, која поседуваше нешто помалку од 10 проценти од акциите на „Кредит суис“ се обратиле на швајцарската влада и на регулаторите со група инвеститори за да инјектираат пет милијарди долари во банката која се најде во потешкотии, според весникот, кој цитира два извори што не ги идентификува.
