.webp){kind=icon}
Холивудските студија ги објавија деталите oд нивниот предлог за договор со сценаристите. Ова е најновиот обид за договор кој треба да доведе до прекин на повеќемесечниот штрајк што го запре производството и ги одложи новите изданија во забавната индустрија.
Студијата предложија зголемување на платите на сценаристите, заштита од употреба на вештачка интелигенција и испраќање квартални извештаи до синдикатот на сценаристите кои ја откриваат гледаноста на емисиите.
Главните извршни директори на големите медиумски компании се повеќе се вклучени во преговорите во последните недели, надевајќи се дека ќе стават крај на спорот кој трае цело лето. Група директори, вклучувајќи го Боб Игер од „Волт Дизни Ко.“, Тед Сарандос од „Нетфликс“ и Дејвид Заслав од „Варнер Брос“, се состанаа во вторникот со раководството на Здружението на сценаристи на Америка.
„Наш приоритет е да го прекинеме штрајкот за да можат ценетите членови на креативната заедница да се вратат на она што го прават најдобро“, рече во изјавата Керол Ломбардини, претседател на Здружението на продуценти на филмови и телевизија, кое ги претставува студијата. „Дојдовме на маса со понуда која одговара на приоритетните грижи изразени од сценаристите“.
Здружението на сценаристите и претставници на студијата продолжија да се состануваат откако студијата предложија нов договор претходно овој месец. Но, двете страни допрва треба да ги решат сите свои разлики. Сценаристите продолжуваат да се залагаат студијата да ангажираат задолжителен број сценаристи во секоја емисија и да им плаќаат дополнителни пари врз основа на популарноста на нивната работа.
