.webp){kind=icon}
БРИКС се проширува. Групата на големи земји во развој ги покани најголемиот извозник на нафта Саудиска Арабија, Иран, Египет, Аргентина, Етиопија и Обединетите Арапски Емирати да му се приклучат на блокот, во обид да го прошири своето глобално влијание.
А една од членките на БРИКС влезе во судир со Јапонија. Kина ќе го запре целиот увоз на морска храна од Јапонците, со што ќе се зголемат тензиите меѓу двете нации, бидејќи Јапонија започна со ослободување на пречистената отпадна вода од уништената нуклеарна централа Фукушима во водите на Тихи Океан.
Ова се другите пет вести што се клучни за овој ден.
Каматите на кредитите од македонските банки почнаа да уриваат рекорди
Затегнувањето на монетарната политика во Македонија почна да дава резултати, а најдобар показател за тоа се каматните стапки на новодоговорените кредити, кои во изминативе неколку месеци се искачија на највисоко ниво во последните три години.
Просечната камата на новите станбени кредити се зголеми од 3,59 проценти во април годинава на над границата од шест проценти во мај и во јуни годинава.
Да не се Охрид и Скопје, ќе немаме туристичка сезона
Туризмот во земјава закрепнува од пандемијата и капацитетите на туристичките места во екот на сезоната се полни. Бројот на домашни и странски туристи во првата половина од годинава е зголемен за 30,1 отсто споредено со лани. Кај домашните туристи има раст од 2,8 отсто, додека кај странските 46,8 отсто.
Најпосетени региони во изминатиот период се Скопскиот и Југозападниот, каде што се наоѓа Охридско Езеро. За шест месеци, Скопје го посетиле 150.000 странски туристи, главно преку редовно организираните странски тури за прошетка, додека во Југозападниот Регион бројот на туристи изнесува близу 140.000. Во преостанатите региони максималниот број на туристи е 30.000.
Стапуваат во сила нови правила на ЕУ за социјалните мрежи
Вкупно 19 големи онлајн платформи и пребарувачи од утре ќе мора да се усогласат со новите правила за интернет-содржини на ЕУ, затоа што стапува во сила Законот за дигитални услуги, усвоен во 2022 година, кој има цел да ги сузбие „нелегалните и штетни дигитални содржини“.
Новите правила се однесуваат на Фејсбук, Инстаграм, Тикток, Екс (поранешен Твитер), Јутјуб, Снепчет, Линкдин, Пинтерест, Амазон, Букинг, Алиекспрес, Заландо, Гугл шопинг, Гугл срч, Гугл мапс, Бинг, Википедија, како и на онлајн продавниците за апликации на „Гугл“ и „Епл“. Станува збор за интернет-платформи што, според статистичките податоци, месечно ги посетуваат над 45 милиони Европејци.
Со смртта на Пригожин, Путин ја враќа контролата врз руската елита
Евгениј Пригожин, човекот што го предводеше бунтот што претставуваше најголема закана за речиси четвртвековното владеење на претседателот Владимир Путин, се верува дека е мртов. А Кремљ повторно е обвинет дека ги осудува на смрт своите противници, што тамошните власти го негираат.
Несреќата се случи точно два месеца по бунтот на Пригожин, кој Путин го осуди како „предавство“, по што брзо се согласи на договор со кој водачот на платеничката војска прифати да се повлече во соседна Белорусија. Многу аналитичари на политиката на Кремљ се сомневаа дека примирјето ќе трае засекогаш, со оглед на досегашните постапки на Путин.
Банкмен-Фрид е оставен на „леб и вода“ и без лекови, велат адвокатите
Барањата на Сем Банкмен-Фрид за вегански оброци и пристап до лекови во затворот не се сослушани, велат неговите адвокати, додавајќи дека бараат и подобар пристап до нивниот клиент за да ја подготват својата одбрана.
Во борбата за повеќе време пред неговото судење за измама во октомври, адвокатите посочија дека 31-годишниот криптомагнат „буквално преживувал од леб и вода“ и малку путер од кикиритки. Тие ги изнесоа своите аргументи додека Банкмен-Фрид беше во федералниот суд на Менхетн во вторникот за да се изјасни за невин по точките на потесното обвинение.
