Тејлор Свифт, Бијонсе и „Барбенхајмер“ им носат милијарди на САД

Треската предизвикана од Тејлор Свифт, Бијонсе и филмското дуо „Барбенхајмер“ ѝ даваат сериозен поттик на американската економија.

Турнеите на мегаѕвездите и блокбастер филмовите се очекува да додадат до 8,5 милијарди долари на американскиот раст во третиот квартал, според „Блумберг економикс“. Околу 50-те американски концерти што пејачките ги закажаа би можеле да додадат 5,4 милијарди долари на бруто домашниот производ, додека филмовите „Барби“ и „Опенхајмер“ се предвидува да додадат околу 3,1 милијарди долари од потрошувачите и од меѓународната продажба на билети.

Вкупно, тоа ќе ги зголеми годишните реални трошоци за лична потрошувачка и БДП за 0,7 и 0,5 процентни поени, соодветно, во периодот од јули до септември, напишаа економистите Ана Вонг и Елиза Вингер во белешка во средата. Економистите речиси ја удвоија својата прогноза за раст во периодот јули-септември, делумно како резултат на добивките од потрошувачката.

Проекциите дополнително одат во прилот на економијата која зајакна во последните месеци. Инфлацијата се намалува, а пазарот на трудот останува цврст, што помага да се поттикне потрошувачката. Тоа наведе некои економисти да ги одложат своите прогнози за рецесија, додека други целосно ги поништија.

Warner Bros.; Universal Pictures

Сепак, тимот на „Блумберг“ тврди дека поттикот што го даваат филмовите и турнеите е краткотраен. Тие истакнуваат дека ниту Бијонсе ниту Свифт не најавиле дека ќе излезат на сцена во САД во последните три месеци од годината, а го опишаа „Барбенхајмер“ како феномен кој многу ретко се случува. Покрај тоа, економијата е сè уште ранлива на пад на побарувачката, а пазарот за домување е под притисок од ниската понуда и зголемените стапки на хипотеките.

„Голем дел од таа сила доаѓа од привремени фактори“, напишаа тие. „Овие фактори создаваат фатаморгана на еластична потрошувачка, кога всушност снемува пареа“.

Економистите ја разгледаа само продажбата на билети за „Барби“ и „Опенхајмер“ до средата и не ги вклучија ефектите од нето-извозот од четирите концерти што Свифт ги изведува во Мексико Сити.

Во моментов нема коментари за веста. Биди прв да коментира...

Остави коментар