Нема докази дека ударот oд бродот што го предизвика уривањето на мостот „Френсис Скот Ки“ бил намерен, соопшти полицијата во Балтимор додека продолжува потрагата по неутврден број исчезнати лица во реката Патапско, јавуваат американските медиуми.
„Апсолутно нема индикации дека станува збор за некаков вид тероризам, дека тоа е направено намерно“, рече началникот на полицијата во Балтимор, Ричард Ворли, на прес-конференција.
Мостот „Френсис Скот Ки“ во Балтимор се урна откако ноќеска товарен брод удрил во еден од неговите столбови.
Бројот на исчезнати лица сè уште не е утврден. По уривањето на мостот спасувачките екипи утврдиле дека има возила во реката Пoтапско.
Гувернерот на Мериленд, Вес Мур, прогласи вонредна состојба по уривањето на мостот во Балтимор. „Благодарни сме им на храбрите мажи и жени што прават напори да ги спасат засегнатите и се молиме за безбедноста на сите“, се наведува во изјавата на гувернерот.
Портпаролот на локалната противпожарна единица претходно изјави дека во водата има дваесетина луѓе, но новите податоци покажуваат дека веројатно има помалку. Потрагата е отежната поради намалената видливост и ниските температури. Температурата на водата во реката е околу девет Целзиусови степени. Во овие услови во реката може да се преживее околу три часа, па нуркачите се во трка со времето.
Прочитајте повеќе: Се урна мост во Балтимор, луѓе и возила паѓаат во водата
Товарниот брод „Дали“, кој го напуштал пристаништето Балтимор за пловидба кон Коломбо, Шри Ланка, не го управувал главниот екипаж, туку локални навигатори, кои се ангажираат токму со намера да се избегнат несреќи како онаа што се случи рано во вторникот.
„Навигаторите ги движат бродовите во и надвор од пристаништето Балтимор“, рече секретарот за транспорт на Мериленд, Пол Видефелд, на прес-конференција во вторникот.
Навигаторите се качуваат надвор од локалните канали и ги носат бродовите во пристаништата.
„Ова важи за бродовите што пловат по пристаништа, канали и реки низ целата земја. Идејата е дека локалните пилоти се свесни за опасностите во секое пристаниште, река и канал. Прерано е да се знае причината за несреќата во вторникот“, рече Видефелд.
Емили Стаусбол од аналитичката компанија „Ксента“ (Xeneta) со седиште во Осло предупредува дека колапсот се заканува да ги попречи глобалните трговски текови, кои веќе се под притисок.
„Транспортните прекуокеански услуги од Далечниот Исток до источниот брег на САД веќе беа погодени од сушата во Панамскиот Канал и неодамнешниот конфликт во Црвено Море, при што стапките се зголемија за 150 отсто“, се наведува во соопштението на Стаусбол. „Овој најнов инцидент ќе ги зголеми тие грижи“.
Веројатно другите пристаништа, вклучувајќи ги Њујорк/Њу Џерси и Вирџинија, ќе се соочат со дополнителен товар доколку Балтимор е недостапен, што може да го ограничи ударот, смета Стаусбол. Но пристаништата имаат ограничен капацитет.
„Прашањето е колку брзо океанските товарни превозници можат да воспостават пренасочувања, особено за бродовите што веќе се на пат кон Балтимор или контејнерите на пристаништето што чекаат да бидат извезени“, нагласува таа.
Ова се неколку важни факти за мостот, добиени од Транспортната управа во Мериленд:
Мостот „Френсис Скот Ки“ е отворен на 23 март 1977 година, како последна врска во клучката I-695 Балтимор што го обиколува градот.
Долг е 1,6 милја и се издига над реката Патапско, каде што Френсис Скот Ки бил инспириран да ги напише зборовите за поемата „Знамето со ѕвезди“ (The Star-Spangled Banner - денешната химна на САД) кога бил сведок на бомбардирањето на Форт Мекхенри вечерта на 12 септември 1814 година.
Биле потребни околу пет години за да се изгради и чинeл 60,3 милиони долари.
Годишно преку него поминуваат околу 11,3 милиони возила.
.webp){kind=icon}
