Бродот што удри во мост имал несреќи и претходно

Бродот што удри и го уништи мостот во Балтимор во вторникот наутро има претходна историја, вклучувајќи најмалку еден претходен судир и проблеми со погонот.

Сè уште не е јасно што го предизвикало ударот на „Дали“ во мостот „Френсис Скот Ки“, но видеоснимката покажува дека речиси сите негови светла се изгаснале непосредно пред ударот. Инцидентот се покажа деструктивен за превозот на едно од најпрометните пристаништа на источниот брег на САД, како и за патниот сообраќај, бидејќи ја прекина клучната врска на главниот автопат околу Балтимор.

„Дали“ удри во камен ѕид во пристаништето Антверпен во 2016 година за време на маневар за откачување, според „Веселфајндер“ (VesselFinder). Бродот, кој бил изграден во 2015 година, претрпел оштетувања на крмата и на трансомот, но останал на површина. Бродот потоа бил поправен.

Bloomberg Mercury

„Вашингтон пост“ објави дека бродот бил продаден на сингапурската компанија „Грејс Оушн Привајт Лтд“ по таа несреќа. „Грејс Оушн“ не беше веднаш достапна за коментар.

Неодамна, се појавија механички проблеми. Минатиот јуни, рутинската безбедносна инспекција во Сан Антонио, Чиле, откри проблеми поврзани со некои мерачи и термометри поврзани со погонската и помошната машина на „Дали“, стои во документите на организацијата која промовира безбедна навигација од Токио. Проблемите не беа основа за задржување на бродот под знаме на Сингапур, а не беше јасно за што точно се работи.

Стандардната инспекција на бродот од страна на американската крајбрежна стража подоцна минатата година не откри никакви недостатоци.

Bloomberg Mercury

Записите и правните сертификати покажуваат дека структурниот интегритет на „Дали“ и функционалноста на неговата опрема биле валидни во моментот на инцидентот во Балтимор, се вели во соопштението на владата на Сингапур. Бродот, исто така, беше подложен на две одделни контроли во прекуокеанското пристаниште во јуни и септември минатата година, иако неисправниот манометар за гориво беше поправен пред бродот да го напушти пристаништето.

Со бродот „Дали“ управува „Синерџи марин“, а бродот е изнајмен од данскиот бродски гигант „А.П. Молер – Маерск“. Портпаролот на лондонската „Синерџи Марин“ изјави дека на бродот имало околу 4.900 контејнери во моментот на последната несреќа. Директорите на компанијата отпатуваа на локацијата за да ја проценат ситуацијата.

Во моментов нема коментари за веста. Биди прв да коментира...

Остави коментар