Израел му одговори на Иран, златото и нафтата скокнаа

Израел му одговори на Иран со напад што дојде помалку од седум дена по нападот со ирански беспилотни летала врз еврејската држава, што ги зголемува стравувањата од ескалација на конфликтот на Блискиот Исток, изјавија двајца американски претставници за „Блумберг“.

Експлозии се слушнале рано во петокот во иранскиот град Исфахан, објави новинската агенција „Фарс“ (Fars News Agency). Агенцијата исто така тврди дека нуклеарните капацитети се целосно безбедни.

Летовите се прекинати во Исфахан, Техеран и Шираз, а иста е ситуацијата и на аеродромите преку западната граница, пишуваат иранските медиуми.

Прочитајте повеќе: Експлозии во Иран, Израел вели дека ја покажал способноста за напад

„Фарс“ наведува дека не се познати детали за нападот на Исфахан, но се верува дека најголемиот број дронови испратени кон Израел во нападот од 13 април се од тој град.

Израелските власти во четвртокот рекоа дека Израел планира да одговори на иранскиот напад во следните ден или два, изјави за „Блумберг“ лице запознаено со разговорите. Американските власти не одговорија на прашањата на „Блумберг“.

По извештајот, цената на нафтата скокна на над 90 долари за барел, а цената на златото надмина 2.400 долари за унца. Приносот на американските 10-годишни обврзници се зголеми за 11 базични поени, а индексот на доларот го достигна највисокото ниво од ноември.