Филмови изработени со вештачка интелигенција на филмскиот фестивал Трибека

Трибека филмскиот фестивал во Њујорк и компанијата „Опен еј-ај“ (OpenAI) планираат да претстават пет кратки филмови направени со вештачка интелигенција (ВИ) - што ќе биде првпат филмови создадени со помош на алатката „од текст во видео“ на „Опен еј-ај“, позната како Сора (Sora), да бидат прикажани на фестивал.

Филмаџиите се согласија да се придржуваат до условите на договорите поврзани со вештачката интелигенција што филмската индустрија ги постигна минатата година со режисерите, актерите и писателите, се вели во соопштение објавено во петокот. Филмовите ќе бидат прикажани во салата на Трибека на 15 јуни, а потоа ќе следи и дискусија.

Како дел од процесот, филмаџиите беа едуцирани за алатките на „Опен еј-ај“, добија ран пристап до Сора и им беше дозволено да ги креираат видеата по свои услови. Учесници се: Бони Дисеполо, Ели Фумби, Никјату Јусу, Реза Сиксо Сафаи и Михаела Тернаски-Холанд. Тие добија само неколку недели да ги завршат проектите.

ВИ генерира и возбуда и вознемиреност во филмската заедница. Ограничувањата на нејзината употреба беа клучна точка за решавањето на минатогодишните штрајкови на холивудските сценаристи и актери, кои стравуваа дека технологијата ќе ги загрози нивните работни места. Други ја прифатија вештачката интелигенција како потенцијална нова алатка за филмаџиите.

„Одлично е да се види како овие филмаџии ја прошируваат својата креативност со Сора и ние сме почестени што нивните дела дебитираат на фестивалот Трибека“, рече Бред Лајткап, главен оперативен директор на „Опен еј-ај“. „Возбудени сме за нивните кратки филмови и жедни сме да научиме како можеме да ја направиме Сора подобра алатка за сите креативци“.