.webp){kind=icon}
Помина првата недела откако новата Влада ја презеде одговорноста за земјава. Новиот премиер и министрите стартот го означија со промоција на нова инвестиција вредна половина милијарда долари од областа на енергетиката. „Алказар енерџи“, независен одржлив фонд со седиште во Луксембург и тим на советници со седиште во Дубаи, ќе гради ветропарк во источна Македонија, кој ќе снабдува со струја 100.000 домаќинства, што е крупен чекор кон крајната цел - земјава да биде енергетски независна.
Премиерот Христијан Мицкоски на промоцијата на новата инвестиција
Втората недела од мандатот новата влада ќе ја почне со нова, повисока цена на струјата. Тоа значи дека иако се зголеми учеството на ветрот и особено на сонцето во производството на струја, за домаќинствата немаше ценовно олеснување. Во интервју за „Блумберг Адрија“ првата министерка за енергетика, рударство и минерални суровини Сања Божиновска вели дека обновливите извори не донесоа поевтина струја затоа што станува збор за приватни инвестиции, а Македонија досега немаше планиран откуп на електрична енергија од обновливи извори.
Нашите аналитичари неделава ги анализираа и предизвиците во нафтениот бизнис преку примерот на словенечки „Петрол“. Целосната анализа можете да ја прочитате на овој линк.
Следен предизвик за новата Влада се јавните финансии. Премиерот Мицкоски кажа дека ребалансот на буџетот ќе биде готов во втората половина на јули, месец во кој државата само по основ на достасани државни хартии од вредност треба да исплати 113 милиони евра. До крајот на годината сумата ќе надмине 480 милиони евра. Оттука, премиерот вели дека ветеното покачување на пензиите ќе се реализира на две рати, во септември и во март.
Во март достасува и сметката од новиот општ колективен договор за јавниот сектор. Ако биде постигнат финалниот договор за дефинирање на коефициентите во согласност со договорот, платите во јавниот сектор ќе се зголемат за околу 30 отсто.
За зголемени ризици сигнализира и распонот на македонските еврообврзници.
Едно од најважните ветувања на сега владејачката ВМРО-ДПМНЕ во предизборната кампања беше борбата со корупцијата. Стопанската комора на Македонија точно навреме, на почетокот на мандатот, ја објави и анкетата меѓу компаниите во земјава за минатата година. Резултатите се поразителни - вкупно 61 отсто од компаниите се соочиле со корупција од два до пет пати во текот на годината. Мито им било барано и од централната и од локалната власт.
И оваа недела беше во знакот на фудбалот, а ние ви донесовме приказна за една страст што е поголема и од играта на зелениот терен – собирање сликички со славните фудбалери.
Она што ќе нè следи и во следните недели е топлото време проследено со силно невреме, кое предизвикува огромни штети. За климатските промени сме директно одговорни сите. Можеме и сами да придонесеме за намалување на штетните емисии, но може и државата да даде поттик во тој правец.
Данска е чекор пред сите – воведува данок за кравите и свињите во обид да ја поттикне нацијата да се откаже од јадење месо. Анализите покажале дека замената на говедското месо од еден оброк може речиси да го преполови јаглеродниот отпечаток за тој ден.
За крај, прочитајте и за одлуката на властите во Барселона да забранат краткорочно изнајмување станови.
