Суспендиран полски новинар кој критикувал песна од отворањето на ОИ

Јавниот сервис на Полска соопшти дека суспендирал новинар и спортски коментатор кој реагирал на изведбата на легендарната песна на Џон Ленон „Замисли“ (Imagine) на отворањето на Олимписките игри со тврдење дека се работи за еден вид „визија на комунизмот“.

ТВП, полскиот јавен сервис, соопшти дека Пшемислав Бабиаж е суспендиран и нема да му биде дозволено во живо да ги коментира спортските настани од Летните олимписки игри во Париз.

Во песната Ленон пее за имагинарен свет без рај и пекол, без држави, религија и приватна сопственост.

„За жал, ова е визијата на комунизмот“, рече Бабиаж за време на церемонијата на отворањето на Олимпијадата, што предизвика контроверзни коментари во Полска.

Објаснувајќи ја суспензијата, ТВП во соопштението наведе: „Заемно разбирање, толеранција, помирување – тоа не се само основните идеи на Олимпијадата, туку и основата на стандардите кои ја водат новата полска телевизија. Нема причина да се прекршуваат“.

Конзервативниот претседател Анджеј Дуда и поранешниот премиер Матеуш Моравјецки беа меѓу првите кои реагираа за да го „заштитат“ суспендираниот новинар.

„Вистината ќе се брани! Вашите постапки ќе бидат запаметени и цензурата ќе пропадне“, напиша Моравјецки на Х.

И некои коментатори блиски до политичката левица во Полска соопштија дека казната е престрога.

Во моментов нема коментари за веста. Биди прв да коментира...

Остави коментар