Медалите за Олимпијадата во Париз се направени од делови на Ајфеловата кула

Изградена помеѓу 1887 и 1889 година, „железната дама“ односно Ајфеловата кула оттогаш помина низ различни фази на реновирање. За време на тој процес, одредени метални елементи беа отстранети и зачувани. Сега тоа е железо (18 грама во секој медал, поточно) исчистено од „Ајфеловото ѓубре“, вратено во првобитната боја и обликувано во шестаголник за медалите што неодамна беа презентирани во седиштето на организацискиот одбор на Олимписките и Параолимписките игри што ќе се одржуваат во Париз. Французите понекогаш ја нарекуваат својата земја „Л'Хексагон“ - шестаголник - поради нејзината форма. Овој симбол се користел за да се изрази вклученоста на целата нација во организацијата на Игрите.

Комитетот ја ангажираше продавницата за накит „Шуме“ (Chaumet), која работи во системот на луксузниот конгломерат на Бернард Арно, ЛВМХ (LVMH), да го смисли дизајнот на медалите. „Шуме“, глобално познат по својата изработка, го претвори медалот во скапоцен камен, со дизајн замислен околу три клучни извори на инспирација: шестаголникот, Ајфеловата кула и поставувањето на скапоцените камења.

Bloomberg

 

Инаку, ЛВМХ е премиум спонзор на Олимписките игри, што е прв ваков договор на луксузен концерн и показател дека корпоративната Франција ја ангажира целата своја финансиска сила за успех на најголемиот спортски настан.

На премиерата на медалите во Париз присуствуваше синот на Бернард Арно, Антоан, потпретседател на компанијата „Кристијан Диор СЕ“ (Christian Dior SE).

Но додека Ајфеловата кула служеше како „главна инспирација“, „Шуме“ исто така ја интегрираше својата историја на правење уникатни парчиња накит, особено дијадеми, пишува на официјалната веб-страница на Игрите. Тоа најмногу се забележува во линиите што личат на сончевите зраци што излегуваат од центарот на медалите.

Bloomberg

 

Шест метални екстензии - по една за секој агол - се користат за фиксирање на шестаголникот. Ова вклопување е можно благодарение на малку конкавната форма на медалот, што му додава длабочина на дизајнот на секоја страна. Избрана е карактеристичната форма на „Клу де Пари“ (Clous de Paris)“, која потсетува на познатите нитни на кулата.

„Железната дама“ беше и инспирација за дизајнот на лентите за медалите. Лентите на олимписките медали ќе бидат темносини, додека панделките на медалите на Параолимпијадата ќе бидат темноцрвени - комбинација од првите две бои („венецијанска црвена“ и „црвено-кафена“) користени на Ајфеловата кула, се објаснува на официјалната веб-страница.

Ќе бидат произведени вкупно 5.084 медали, од кои околу 2.600 ќе бидат за Олимпијадата и 2.400 за Параолимпијадата. Овие бројки се планирани да ги покријат сите можни сценарија, вклучувајќи и случаи на повторно доделување медали по Игрите, што може да се случи кога на победниците ќе им се одземат наградите, да речеме, поради допинг. Некои медали се чуваат во резерва во овие случаи, им се даваат на музеите или, во случај на голем вишок, се уништуваат. Медалите ќе се произведуваат во француската ковачница „Моне де Пари“.

Другата страна на медалот

Како и со секое претходно издание на Игрите, другата страна на олимпискиот медал ја раскажува приказната за обновувањето на Игрите во Грција. Како и на медалите од 2004 година, божицата на победата Атина Ника е прикажана како излегува од стадионот „Панатинаикос“, кој беше сведок на обновувањето на Олимписките игри во 1896 година. Тоа ги поврзува Акропол и Ајфеловата кула. На овој начин  се „покрива“ сè: инспирацијата од античките игри во Грција, француските корени на модерните Олимписки игри и нивното годишно издание во Париз.

Од друга страна, параолимписките медали се чист одраз на Париз 2024 и креативните избори на „Шуме“, кои се истакнати на другата страна на медалот. Графичкиот приказ на Ајфеловата кула од перспектива одоздола ќе им овозможи на добитниците на медали да ја откријат Ајфеловата кула од ретко виден агол. Зборовите „Париз“ и „2024“ го опкружуваат подножјето на кулата, напишани со универзална Брајова азбука, симболична референца на нејзиниот француски пронаоѓач Луј Брај. За да им се овозможи на спортистите со оштетен вид да ја почувствуваат разликата помеѓу медалите, на работ се врежани цртички: I за злато, II за сребро и III за бронза.

По креирањето на дизајнот на олимпискиот оган за Зимските олимписки игри во Албервил во 1992 година, креативната работа на Филип Старк, дизајнер и архитект од Париз, опфаќа различни области, но најскапите проекти во последниве години се издвојуваат за суперјахти вредни до 300 милиони долари. Овде можете да ја видите неговата флота и кои се супербогатите што ги нарачале овие пловни објекти. Старк го прифати барањето на Олимпискиот комитет на игрите во Париз да дизајнира престижни награди за најдобрите спортисти на Игрите околу предлогот на веќе претставениот дизајн, кој беше промовиран во 2017 година, уште со кандидатурата на Париз за Олимписките и Параолимписките игри во 2024 година. Тоа се случи во Лозана пред 89 члена на Интернационалниот олимписки комитет (ИОК) и во присуство на претседателот на Франција, Емануел Макрон, градоначалникот на Париз, Ане Идалго, и соизвршниот претседател на комитетот за кандидатура на Париз за 2024 година, Тони Естанге, кој сега има функција како претседател на Олимписките и Параолимписките игри.

Тој го замислил медалот како „направен за споделување“ и создал уникатен дизајн што можете да го видите на неговата официјална веб-страница. Главниот медал содржи три помали медали кои можат да им бидат доделени на оние за кои победникот смета дека заслужуваат признание.

„Поразите и победите се колективен успех. „Зад овие спортисти кои се стремат кон извонредност, стојат невидливи раце кои ги следат, поддржуваат и обликуваат телото и умот на шампионите“, изјави Старк за овој проект.

Никој сега не го спомнува неговиот дизајн, ниту причините зошто дојде до промена. Во заедничката изјава на ЛВМХ и Комитетот за игри, Естанге изјави дека „благодарение на ’Шуме’, медалот за Игрите во Париз 2024 станува вистинска уметност, богатство што ги обединува сјајот на Париз и крунисувањето на сите оние што ќе се искачат на подиумот за време на Олимпијадата и Параолимпијадата“, а Арно ја нагласи улогата на мајсторите на „Шуме“ (Maison Chaumet), кои „нурнаа во нивните архиви и ги истражуваа моќните симболи на олимпизмот за да дизајнираат декорација инспирирана од високата уметност на накит“ и додаде дека „’Шуме’ пишува нова страница, која засекогаш ќе остане врежана во наследството“.

Bloomberg

 

ЛВМХ се приклучи на спонзорскиот клуб релативно доцна, минатата година во мај, кога остана само едно место предвидено за шест премиум партнери. Во таа категорија се и компанијата за финансиски услуги „Груп БПЦЕ“ (Groupe BPCE) - која прва го потпиша договорот уште во 2018 година - синџирот супермаркети „Керфур“ (Carrefour), енергетската компанија ЕДФ (EDF), телекомуникацискиот гигант „Оранж“ (Orange) и биофармацевтската компанија „Санофи“ (Sanofi).

Финансиските детали од тие зделки не се јавни, но „Ле паризиен“ (Le Parisien) пишува дека премиум партнерите плаќаат меѓу 80 и 150 милиони евра за ова партнерство. Проценетите суми сугерираат дека само овие шест компании сочинуваат повеќе од половина од приходите од домашното спонзорство за Париз во 2024 година. Други спонзори се: компанијата за часовници „Омега“ , хотелската група „Акор“, „Виза“, „Тојота“, „Самсунг“, „Панасоник“, Кока-Кола“, „Атос“, P&G, „Алибаба“, Ербиенби“, „Вестфилд“, „Ер Франс“. „Игрите се можност Франција да блесне“, рече Антоан Арно за приклучувањето на спонзорството минатата година во изјавата што ја објави Ројтерс. Некои извори потврдуваат дека спонзорството на ЛВМХ чинело околу 150 милиони евра. Нема сомнеж дека, покрај медалите, на Олимпијадата ќе блеснат и најголемите модни и шампањски брендови од луксузната групација. И, секако, „Шуме“.

Во моментов нема коментари за веста. Биди прв да коментира...

Остави коментар