.webp){kind=icon}
Кина ќе ја зголеми старосната граница за пензионирање за првпат од 1978 година, потег што најверојатно ќе го забави падот на работната сила, но ќе ги налути работниците, кои веќе се борат со забавената економија.
Највидните пратеници во земјата го поддржаа планот за постепено одложување на пензионирањето на вработените, објави во петокот новинската агенција „Ксинхуа“ (Xinhua). Возраста за пензионирање кај мажите ќе се зголеми од 60 на 63 години, додека кај жените од 50 и 55 на 55 и 58 години, се наведува во извештајот. Оваа промена ќе се воведе во текот на 15 години, почнувајќи од 1 јануари 2025 година.
„Властите на сите нивоа треба активно да одговорат на стареењето на населението, да ги поттикнуваат и поддржуваат вработувањето и претприемаштвото на работниците“, се наведува во одлуката на Постојаниот комитет на Националниот народен конгрес.
Највисокото законодавно тело на земјата исто така ги повика официјалните лица да ги заштитат правата на работниците и да ја подобрат грижата за старите лица и го овласти Државниот совет, кабинетот на Кина, да ги приспособи мерките доколку е потребно.
Одобрувањето следува по јулското соопштение на владејачката Комунистичка партија дека старосната граница за пензионирање ќе се зголеми на „доброволен, флексибилен начин“. Дозволувањето на повеќе луѓе да работат подолго ќе се спротивстави на демографските ветрови што ја оптоваруваат втората по големина економија во светот, иако ризикува да го зголеми незадоволството на јавноста во услови на економско забавување.
„Временската рамка за зголемување на старосната граница за пензионирање е многу постепена. Креаторите на политиката веројатно го зедоа предвид потенцијалното негативно влијание и внимателно го калибрираа тоа“, рече Мишел Лам, економист за Кина во „Сосиете женерал“ (Societe Generale SA).
Во документот се додава дека почнувајќи од 2030 година, работниците во Кина исто така ќе мора да плаќаат подолго на своите пензиски сметки пред да се квалификуваат да ја добијат својата пензија. Условот постепено ќе се зголемува од 15 на 20 години.
Дискусијата на највисокиот законодавен дом за планот претходно неделава предизвика излив на гнев на социјалните мрежи, каде што многумина се пожалија на слабиот пазар на трудот. Некои корисници исто така истакнаа како работодавците често ги дискриминираат постарите кандидати, проблем што владата минатиот месец вети дека ќе го реши.
Возраста за пензионирање во Кина е меѓу најниските во светот и покрај значително зголемениот животен век. Барем од 1970-тите, прагот за работници се одржува на 60 години за мажи и помеѓу 50 и 55 за жени. Со промената ќе се зголеми возраста за пензионирање на жените на 55 години за обичните работнички и 58 за оние што се на раководни позиции.
Поголемата даночна основа и одложениот пристап до бенефиции ќе го намалат притисокот врз владата да ги финансира пензиите бидејќи населението брзо старее, при што стапката на наталитет забележа рекорден пад минатата година.
„Одржливоста на пензискиот систем може да биде главната грижа зад овој потег“, рече Динг Шуанг, главен економист за Кина и Северна Азија во „Стандард чартерд“ (Standard Chartered). „Влијанието врз економијата на краток рок треба да биде ограничено бидејќи зголемувањето е постепено“.
Луѓето на возраст од 65 години и постари се очекува да сочинуваат 30 отсто од населението до околу 2035 година од 14,2 отсто во 2021 година, според извештајот од вторникот на државната телевизија ЦЦТВ (CCTV).
