.webp){kind=icon}
Кои се тајните на издржливоста на семејните бизниси во регионот? Ова е главната тема во најновиот број на нашиот магазин „Блумберг бизнисвик Адрија“, кој излезе неделава. Низ разговори со повеќе сопственици на компании во регионот откривме дека тие најчесто се управувани од нивните основачи. Прашавме зошто постарите се плашат од пензија и колку брзо и лесно можат да им го пренесат управувањето на помладите.
Паралелно анализиравме и како да ги вратиме младите што ја напуштија државава. Поразително е што тука не сме моќни. Нема да се вратат, а тоа нема никаква врска со висината на платите.
Македонските компании од автомобилскиот сектор сè уште работат со полн капацитет. Но одговорот на прашањето до кога ќе биде тоа така останува да виси во воздух.
Германија е земјата што најскапо го плати монетарното затегнување од претходниот период. БМВ пријави проблеми. „Фолксваген“ за првпат во својата историја најави затворање на фабрика и во Германија.
„Ова се само првите предвесници на една сериозна криза што ни претстои“, велат македонските производители на компоненти за германската автомобилска индустрија.
Нема добри вести неделава ниту од другите земји во еврозоната. Проблемите откај германските производители се шират низ Европа, а ефектот од Олимпијадата на услужниот сектор во Франција веќе исчезна.
Оптимизам буди најновиот извештај на ОЕЦД, според кој глобалната економија ја надминува инфлаторната криза и е на пат да оствари стабилен раст.
Прочитајте повеќе:
„Комерцијална банка“ не успеа да ја преземе „Стопанска банка“ АД Битола
Продолжува растот на цената на кафето. Во текот на годинава робустата поскапе за 80, а арабиката за 30 отсто. Цените ќе растат барем до средината на идната година, а домашните производители велат дека во земјава љубителите на кафето веќе почнале да живеат со пониски дози кофеин.
Кинеската централна банка објави широк пакет мерки за монетарни стимулации за заживување на економијата во земјата. Дел од пакетот мерки е и опцијата во најголемите државни банки во земјата да бидат вшприцани 142 милијарди долари капитал за да се засили нивната способност да ја поддржат економијата. По веста за државната поддршка во втората по големина економија во светот, поскапе нафтата.
Прочитајте повеќе:
Колку чини квадрат во Скопје: Стан во Центар или два во Чаир?
Колку е преценета пазарната вредност на становите во Македонија?
Земјите производители на нафта прогнозираат дека побарувачката за енергентот ќе расте и покрај силните заложби за исполнување на климатските цели до 2050 година.
Земјава претходно ги одложи плановите за затворање на рудниците на јаглен за 20 години, но бројките за јули покажаа дека производството на струја во термоцентралите паднало под 30 отсто. Рекордно топлиот месец го зголеми производство на струја од сонце за над 500 отсто.
Поради климатските цели земјите од регионот веќе истражуваат дали нивните системи можат да се адаптираат за транспорт на водород. Истраживме што може земјава да направи на овој план.
