ЕКОНОМИЈА
Дејли: Фед ќе продолжи да ги намалува каматните стапки
Претседателката на Фед во Сан Франциско, Мери Дејли, изрази очекување дека американската централна банка ќе продолжи да ги намалува каматните стапки за да се заштити од натамошно слабеење на пазарот на трудот. Дејли исто така истакна дека досега не се појавиле информации што сугерираат дека Фед нема да продолжи да ги намалува каматните стапки.
Потсетуваме дека минатиот месец Фед ја намали референтната каматна стапка за половина процентен поен, на опсег од 4,75 до 5 отсто, бидејќи инфлацијата се приближуваше до целта од два отсто.
ПОЛИТИКА
Почнува самитот на БРИКС во Казањ
Самитот на БРИКС, чиј домаќин е рускиот претседател Владимир Путин, започнува денеска во Казањ, Русија. На тридневниот самит ќе присуствуваат лидери на 32 земји, како и врвни претставници на регионалните организации и генералниот секретар на Обединетите нации, Антонио Гутереш.
На средбата ќе се разговара за меѓународните проблеми, со акцент на влошената ситуација на Блискиот Исток, а треба да се размислува и за проширување и прием на нови земји.
Единаесетта посета на Блинкен на Блискиот Исток
Американскиот државен секретар Ентони Блинкен денеска е во посета на Израел, како дел од турнејата на Блискиот Исток. Предвидена е средба со израелските лидери, со кои ќе разговараат за потенцијалната деескалација на конфликтот во Газа и во Либан.
БИЗНИС
На корпоративен план дојде до промена во менаџментот на компанијата „Дизни“. Имено, „Волт Дизни“ го назначи Џејмс Горман за претседател на компанијата, додека новиот извршен директор треба да биде назначен на почетокот на 2026 година.
Горман, поранешен извршен директор на „Морган Стенли“, ќе го наследи Марк Паркер на функцијата претседател на компанијата.
БЕРЗА
Европа
Фјучерсите на европските акции утрово се тргуваат во минус, пред објавувањето на корпоративните извештаи и претставувањето на извештајот на Меѓународниот монетарен фонд за изгледите за светската економија.
САД
Во исто време американските индексни фјучерси се тргуваат со загуби. Пред Волстрит е клучна недела кога станува збор за објавување на корпоративните резултати, бидејќи дури една петтина од компаниите што се дел од индексот S&P излегуваат со своите деловни извештаи.
Трговците се подготвуваат и за билансите на „Тесла“ и на „Боинг“. Од друга страна, инвеститорите се фокусирани и на монетарната политика на Фед, откако претседателот на Фед од Минеаполис изјави дека е за намалување на каматните стапки со побавно темпо во наредните квартали.
Азија
Кога станува збор за акциите во азиско-пацифичкиот регион, тие главно паѓаат втор ден по ред. Акциите во Австралија иво Јапонија паѓаат, додека кинеските пазари растат. Азиските пазари ја чекаат најпрометната недела кога станува збор за котација на акции на компании на берзата, а прва на ред е индиската филијала на автомобилскиот производител „Хјундаи“.
Цената на нафтата беше во мал пад по растот во понеделникот, а енергетските инвеститори внимателно ги следеа пораките од Израел и од Иран.
.webp){kind=icon}
