.webp){kind=icon}
Во САД и во светот веќе се чувствуваат ефектите од враќањето на Доналд Трамп во Белата куќа. Криптовалутите би можеле да достигнат невидени вредности, доларот зајакнува и влијае на цените на суровините, при што денеска и нафтата и клучните метали се во пад. Сите берзи се во црвено, а единствениот европски индекс што забележа раст утрово е лондонскиот FTSE 100.
ПОЛИТИКА
Засилена моќ на Трамп
Американските републиканци ја задржаа тесната мнозинска контрола и во Претставничкиот дом на американскиот Конгрес, добивајќи обединета контрола над гранките на власта и спречувајќи потенцијално ограничување на моќта на новоизбраниот претседател Доналд Трамп. Овие изборни резултати речиси целосно ги елиминираат шансите на демократите да го намалат влијанието на Трамп врз економијата на САД во наредниот период. Освен тоа, неговото влијание веќе се чувствува во сферата на климата и екологијата, при што КОП 29 останува во сенка на враќањето на Трамп во Белата куќа.
Контролата на Трамп врз таканаречената вашингтонска трифекта, која претходно го освои мнозинството во Сенатот, ја зајакнува раката на партијата да продолжи со даночните олеснувања, да ги намали регулативите за Волстрит и енергетската индустрија и да воведе контрола врз имиграцијата. Републиканската партија ќе има најмалку 218 од 435 места во Претставничкиот дом.
КРИПТОВАЛУТИ
Биткоинот достигна вредност од 93.000 долари
Најголемата светска криптовалута скокна над 93 илјади долари во еден момент. Овој скок дојде поради очекувањата за понатамошно намалување на каматните стапки на Федералните резерви. Биткоинот порасна за шест проценти, пред да ги намали добивките на малку под 90 илјади долари.
На „Блумберг Адрија“ прочитајте и за тоа што е „Трамп памп“ и какви ризици носи за криптовалутите. Инвеститорот и советник во „Грин мајнинг“ (Green Mining DAO), Кристијан Глибо, верува дека растот на цената на биткоинот сигурно ќе продолжи и дека во 2025 година ќе надмине 150.000 долари. „Ако не и над 200.000 долари, во зависност од движењата на другите пазари и макроекономските фактори“.
ЗЛАТО И НАФТА
На пазарот на благородни метали, цената на златото продолжи да паѓа четири дена поради растот на доларот. Златото падна за повеќе од седум проценти од 31 октомври, кога достигна рекорд. Спот цената на златото моментално изнесува нешто под 2.600 долари за унца. Исто така дојде до пад на цената на бакарот.
Зајакнувањето на американската валута исто така влијаеше на нафтата, која падна денеска. Глобалниот референтен брент падна под 72 долара за барел, додека ВТИ (West Texas Intermediate) беше близу 68 долари. Доларот, инаку, порасна на највисоко ниво во последните две години по победата на Доналд Трамп. Тој исход ги прави цените на суровините во долари поскапи за повеќето купувачи.
БЕРЗИ
Европа
Фјучерсите на европските акции тргуваат претежно во црвено додека трговците ги анализираат американските податоци за инфлацијата. Да потсетиме, европските берзи и тргувањето во средата завршија главно со загуби. Добивки забележа единствено лондонскиот индекс FTSE 100, со скромен раст од 0,06 проценти, чии фјучерси денеска единствени се тргуваат во зелено.
САД
Истовремено, фјучерсите на американските акции се тргуваат во црвено, бидејќи трговците го ставаат фокусот на податоците за индексот на производствените цени што ќе бидат објавени во текот на денот. Индексот на доларот порасна за речиси петтина процент, на својот двегодишен максимум. Да потсетиме, податоците за потрошувачките цени беа во согласност со очекувањата, па бројките го поддржаа потенцијалното намалување на Фед кон средината на декември. Трговците ја зголемија веројатноста за намалување на каматите на 80 проценти во однос на претходните 56 проценти.
Азија
Кога станува збор за акциите во азиско-пацифичкиот регион, и тие се тргуваат претежно во црвено, бидејќи посилниот долар и слабите изгледи за раст во Кина го оптоварија пазарот и ги поколебаа инвеститорите. Регионалниот индекс MSCI е во пад за 1,22 проценти, кинескиот CSI 300 се лизна за 1,42 проценти, додека акциите во Хонгконг потонаа за 1,83 проценти. Јапонскиот индекс Topix, кој заедно со Nikkei 225 е меѓу клучните индекси на Токиската берза, денеска тргува со загуби од третина процент. Јапонскиот јен дополнително падна во однос на доларот, на најслабо ниво од јули.
