Бугарија може да влезе во продолжен период на политичка парализа, откако поранешниот премиер Бојко Борисов победи на парламентарните избори, иако не освои мнозинство.
На четвртите избори за помалку од две години, конзервативната партија на Борисов освои 25 отсто од гласовите, според официјалните податоци објавени рано во понеделникот. На второ место со 20 отсто од гласовите се најде партијата на другиот поранешен премиер, Кирил Петков, чија реформска влада траеше само седум месеци.
„Ќе го почитуваме она што народот го избра“, рече Петков пред новинарите доцна во неделата, признавајќи го поразот, истовремено изјавувајќи дека Борисов е слободен да формира влада.
Сепак, политичката изолација на Борисов и партиската поделеност на земјата, исто така, значат дека патот до освојување мнозинство е компикуван. Подолгиот период за формирање на коалиција, па дури и можноста за петти избори, би можеле да ја отежнат борбата на Бугарија со рекордната инфлација и последиците од руската инвазија на Украина, како и спроведувањето на планот за воведување на еврото.
„Бугарските гласачи очекуваат компромиси, сакаат да се формира влада“, изјави за БНТ, Борјана Димитрова, менаџер во компанијата Alpha Research, според која процесот нама да биде лесен.
Најсиромашната членка на Европската унија се бори со најтешката криза во последните децении откако Русија, нејзин поранешен сојузник, го прекина снабдувањето со гас во април. Бугарија речиси целосно се потпираше на увозот на енергија од Кремљ пред конфликтот, а сега челниците во земјата со 6,5 милиони жители треба да се борат за нови ресурси.
Радев ги држи уздите
Досега имаше привремен кабинет назначен од претседателот на Бугарија, Румен Радев, пензиониран армиски генерал. Радев претходно ги отфрли обвинувањата дека неговата земја има мек однос кон Москва.
Додека Петков се бореше да се оттргне од Русија, привремената влада назначена од Радев презеде чекори за заживување на преговорите со руската државна компанија „Гаспром“ за продолжување на снабдувањето.
Шефот на државата Радев ги критикуваше санкциите воведени од ЕУ откако Кремљ го окупираше Крим во 2014 година, за кој во еден момент сигнализираше дека ѝ припаѓа на Русија.
Во говорот минатата недела тој ја осуди агресијата на рускиот претседател Владимир Путин, но и предупреди дека ЕУ треба да го ублажи ризикот од сопствените санкции наметнати кон Кремљ.
„Станува сè потешко да се формира влада“, им рече Радев на новинарите во Софија претходно во неделата, откако го даде својот глас. „За справување со кризата, на нашата земја ѝ требаат силни и легитимни институции, одлучни реформи и стратешки одлуки со долгорочна перспектива“.
Борисов во изолација, Петков слаб
Партијата на Борисов, Граѓани за европски развој на Бугарија (ГЕРБ) доминираше во земјата повеќе од една деценија, пред да биде поразена минатата година од партијата на Петков „Ја продолжуваме промената“ (ПП). Со поддршка на масовните протести против корупцијата и Борисов, Петков ги победи конзервативците и вети искоренување на корупцијата. Таа поддршка е ослабена, иако политичката изолација на Борисов му остава мал избор.
Движењето за права и слободи, партијата на турското национално малцинство во Бугарија, освои 14 отсто, додека националистичката партија „Преродба“ 10 отсто, многу помалку од очекуваното. Проруската социјалистичка партија освои девет отсто од гласовите.
Партиските лидери ќе имаат три обиди да формираат мнозинство. Доколку тоа не вроди со успех, претседателот ќе мора да распише нови избори.
.webp){kind=icon}
