.webp){kind=icon}
Од три причини, глобалната економија наликува на онаа во 1970-тите: постојани нарушувања од страната на понудата што ја поттикнуваат инфлацијата, можности за слабеење на растот и ранливости со кои се соочуваат пазарите во развој, оценува Светската банка во најновиот извештај.
Банката предупредува дека остриот економски пад ќе биде правило во многу земји бидејќи проекциите за глобалниот економски раст се намалени.
Светската банка очекува глобалниот раст да падне на 2,9 отсто во 2022 година, што е далеку под 4,1 отсто проектирани во јануари.
Слабиот раст и растечката инфлација го зголемуваат ризикот од стагфлација, со потенцијално штетни последици за економиите со средни и ниски приходи. Стагфлација е состојба на држава или област на монетарната унија во која економијата е истовремено во состојба на стагнација и инфлација.
Ваквото темпо ќе се задржи до 2024 година бидејќи војната во Украина на краток рок предизвикува нарушувања во активностите, инвестициите и трговијата, побарувачката исчезнува, а приспособувањето на фискалната и монетарната политика напредува полека.
Како резултат на штетите од пандемијата на коронавирус и војната, нивото на приход по глава на жител во економиите во развој оваа година ќе биде речиси пет проценти под трендот пред пандемијата.
„Војната во Украина, блокадите во Кина, прекините на синџирот на снабдување и ризикот од стагфлација го кочат растот. За многу земји, рецесијата ќе биде тешко да се избегне“, изјави вчера претседателот на Светска банка Дејвид Малпас. Тој смета дека има итна потреба да се зајакне производството и да се избегнат трговските ограничувања.
– Потребни се промени во фискалната, монетарната, климатската и должничката политика за државите да може да се спротивстават на погрешната распределба на капиталот и нееднаквоста, рече тој.
За земјите во развој, Банката препорачува штедење и ублажување на ефектите од кризата за најсиромашните.
„Користењето на кредибилни рамки на монетарната политика и заштитата на независноста на централната банка може ефективно да ги закотви инфлациските очекувања и да ја намали количината на затегнување на политиките потребни за да се постигнат посакуваните ефекти врз инфлацијата и активноста“, рече Ајхан Косе, директор на Групата за економски проекции на Светска банка.
Аналитичарите на Светска банка очекуваат глобалната инфлација да се намали следната година, но веројатно ќе остане над целите за инфлација во многу економии.
