.webp){kind=icon}
Некои од клучните сојузници на Украина, меѓу кои и САД, размислуваат да пристапат кон целосна забрана на најголемиот дел од извозот во Русија, што потенцијално би било значајно заострување на економскиот притисок врз претседателот Владимир Путин поради неговата војна.
Според познавачи на ова прашање, претставници на Групата седум (Г7) разговараат за идејата пред лидерскиот самит во Јапонија во мај, а целта би била во забраната да се вклучат земјите-членки на Европската Унија. За предлогот сè уште се расправа и може да се промени, велат упатените.
Пристапот за кој разговараат дипломатски претставници ќе биде пресврт во тековниот режим на санкции, при што сите извози ќе бидат забранети освен доколку не се воведат извесни изземања, велат изворите. Според сегашните критериуми, секој извоз е дозволен, освен ако не е санкциониран.
Ако лидерите на Г7 го одобрат потегот на самитот, тогаш ќе треба да се договори што точно би било исклучено, при што на таа листа би можеле да се најдат лекови и земјоделски производи - вклучувајќи и храна, посочува еден од изворите.
Но, постојат потенцијално сериозни пречки за спроведување. За да стапат во сила во ЕУ, новите критериуми ќе треба да бидат усвоени од сите членки, а тоа ќе предизвика дебата, со оглед на веројатната реакција од компаниите што сè уште извезуваат стоки во Русија, а предвид ќе се земе и ризикот од одмазда од страна на Москва.
Ако се воведе речиси целосно ембарго на извозот, голем дел од преостанатите трговски текови од овие земји со Русија ќе пресуши. Портпаролот на Советот за национална безбедност на САД одби да ги коментира изгледите за таков потег.
Досега санкциите речиси ја преполовија вредноста на извозот на ЕУ и Г7 во Русија, со ограничувања на сè, од електроника до луксузни добра. Сепак сè уште има извоз на стоки во вредност од 66 милијарди долари од Европа, САД, Канада и Јапонија, според трговскиот надзор на податоци со седиште во Женева.
Членките на Г7 се загрижени дека тоа е преголема придобивка за економијата на Путин за време на војната, особено затоа што Москва наоѓа начини за заобиколување на санкциите и внесува стоки преку трети земји. Г7 и ЕУ воведоа неколку рунди на санкции, од кои некои вклучуваа грејс-период пред да стапат во сила.
Русија одговори на санкциите со воведување сопствени забрани за извоз и периодично намалување на испораките на енергија во Европа. ЕУ би била особено ранлива на ограничувањата на стоки како бакар. А речиси целосната забрана за извоз во Русија би можела да ја доближи Москва уште повеќе до Кина, бидејќи бара алтернативи за санкционираните стоки.
Москва престана да објавува бројки за увозот, но неколку меѓународни набљудувачи и влади го следат нивниот извоз во Русија и царинските податоци.
Германија, Италија и Полска остануваат првите три европски извозници на стоки во Русија, покажуваат податоците на „Трејд дата монитор“ (Trade Data Monitor).
