Трамп обвинет за одземање на тајни владини документи

Поранешниот американски претседател Доналд Трамп е обвинет затоа што одбил да ги врати доверливите документи пронајдени во неговиот дом на Флорида, според три анонимни извори. Обвинението пред федералниот суд во Мајами е вонредно, бидејќи Трамп никогаш не бил обвинет за федерални злосторства.

Ова речиси сигурно ќе направи пресврт во трката за републикански претседателски кандидат во 2024 година и значи дека Трамп, доколку биде осуден, може да се соочи со затворска казна или дисквалификација од вршење јавна функција, во зависност од обвиненијата.

Обвинението е запечатено и содржи седум точки, вклучително намерно задржување информации за националната одбрана, коруптивно прикривање документи, заговор за попречување на правдата и давање лажни изјави, според лице запознаено со случајот кое побара анонимност за да може да разговара за информациите кои се од доверлив карактер. Документот би можел да биде објавен в петок.

Осуда за намерно прикривање или уништување на владини документи носи казна со лишување од функција, но правните експерти не се согласуваат околу тоа дали ова се однесува на претседателската функција. Прекршувањето на Законот за шпионажа со задржување информации за националната одбрана носи до 10 години затвор, а попречувањето на правдата носи до 20 години зад решетки, иако Трамп најверојатно нема да се соочи со максимални казни.

„Не сум крив“

Трамп тврдеше дека не е виновен во објава во четвртокот вечерта на неговата платформа „Трут“ (Truth Social) и рече дека бил повикан да се појави пред федералниот суд во Мајами во вторник.

„Никогаш не мислев дека е можно вакво нешто да му се случи на поранешен претседател на САД“, напиша тој.

Bloomberg

Кампањата на Трамп го нарече обвинението „чин на отворена правна 'војна'“.

Белата куќа одби да коментира, како и Министерството за правда.

Жестока конкуренција

Обвинението на Трамп натрупува правен и политички притисок бидејќи тој е обвинет и во посебен случај во Њујорк. Исто така, доаѓа во текот на недела кога тројца други потенцијални ривали - неговиот поранешен потпретседател Мајк Пенс, поранешниот гувернер на Њу Џерси, Крис Кристи и гувернерот на Северна Дакота, Даг Бургум - објавија дека ќе се борат против него за претседателска кандидатура во рамки на Републиканската партија. 

Трамп се чини дека е фаворит за номинација со непоколеблива база на поддршка за време на обвинението од страна на окружниот обвинител на Њујорк, Алвин Брег, за исплата на порно-актерката Сторми Даниелс, како и за граѓанската пресуда во Њујорк, според која тој е одговорен за сексуална злоупотреба на писателката Е. Џин Керол.

Но, со оглед на тоа што кандидатите како гувернерот на Флорида, Рон Десантис и сенаторот од Јужна Каролина, Тим Скот нудат алтернативни платформи, Трамп ризикува да ја изгуби поддршката од умерените републиканци, независните и гласачите во предградијата.

Други обвиненија

Трамп, исто така, се соочува со граѓанска тужба од њујоршката јавна обвинителка Летиција Џејмс поради проценките на имотот на неговата компанија и тековни истраги од Министерството за правда и окружниот обвинител на Атланта поради неговите напори да го поништи изборниот пораз во 2020 година од сега актуелниот претседател, Џо Бајден.

Bloomberg

Трамп тврди дека сите случаи против него се политички лов во матно со цел да го спречат да биде реизбран во Белата куќа.

Истрагата за доверливи документи на Министерството за правда се фокусираше на долготрајните напори да се принуди Трамп да ги врати владините досиеја земени од Белата куќа кога тој напушти функцијата во 2021 година, потоа чувајќи ги во неговото одморалиште Мар-а-Лаго. Минатиот август, ФБИ доби налог и изврши претрес без преседан во дом на поранешен претседател поради загриженоста дека Трамп не ги вратил сите строго тајни материјали во Националниот архив, каде што припаѓаат, дури и откако добил федерален повик со кој се барало од него да го стори тоа. 

Во моментов нема коментари за веста. Биди прв да коментира...

Остави коментар