Украинскиот претседател Володимир Зеленски денеска остро го критикуваше НАТО затоа што Украина не доби временска рамка за приклучување кон Северноатлантската алијанса. Според Зеленски апсурдно е на Самитот во Вилнус да не и се понуди на Украина членство во НАТО, бидејќи според него Украина заслужува почитување стои во статусот објавен на „Твитер“.
„Се чини дека нема подготвеност Украина да биде поканета во НАТО или да стане членка на Алијансата. Тоа значи дека е оставена можност да се преговара за членството на Украина во НАТО во преговорите со Русија. А, за Русија тоа значи мотивација да го продолжи својот терор“ посочи Зеленски.
Американскиот претседател Џо Бајден денеска изјави дека се согласил со „предложената формулација за можноста Украина во иднина да се приклучи на НАТО“. Изјавата на Бајден пред почетокот на самитот на НАТО дојде кусо откако украинскиот претседател Володимир Зеленски издаде изјава за „очекуваната формулација“, сугерирајќи дека не оди доволно далеку кон неговите цели за пристапување. Војната на Русија во Украина е меѓу главните точки на агендата на лидерите на НАТО, заедно со дискусијата за идниот пат за приклучување на земјата разурната од војна во Алијансата, што предизвика одредена поделеност меѓу лидерите.
„Се согласуваме со формулацијата што ја предложивме – а вие во однос на иднината на Украина предложивте да може да се приклучи на НАТО“ рече Бајден во кусата изјава заедно со генералниот секретар на НАТО Јенс Столтенберг пред самитот.
Зеленски претходно на Твитер напиша дека „примил сигнали оти одредени формулации се дискутираат без Украина“, нагласувајќи дека „формулирањето е за поканата да стане членка на НАТО, а не за членството на Украина“.
Во меѓувреме светските лидери ја поздравија одлуката на Турција повеќе да не го попречува приемот на Шведска во НАТО. Американскиот претседател Џо Бајден, кој вчера пристигна во Вилнус на самитот на НАТО, ја поздрави согласноста на турскиот претседател Реџеп Таип Ердоган за членство на Шведска во Алијансата.
„Подготвен сум да работам со претседателот Ердоган и со Турција за зајакнување на одбраната и одвраќање во евроатлантската зона“ рече Бајден, истакнувајќи дека „едвај чека“ Шведска да стане 32-та членка на НАТО. И високиот претставник на ЕУ за надворешна и безбедносна политика Жозеп Борел со статус на Твитер (Twitter) ја поздрави веста за примот на Шведска.
„Денеска во Вилнус беше направен историски чекор. На Шведска и е отворен патот кон НАТО! Ова е добра вест за шведскиот народ и за нашата заедничка безбедносна и одбранбена политика. Колку НАТО е посилен, толку е побезбедна Европа.“ Вилнус е домаќин на дводневен самит на НАТО, на кој членките ќе се обидат да ја надминат поделеноста околу идното приклучување на Украина.
.webp){kind=icon}
Во моментов нема коментари за веста. Биди прв да коментира...