.webp){kind=icon}
Министерот за надворешни работи Бујар Османи вели дека нема никакви индиции дека шефот на американската дипломатија Ентони Блинкен нема да дојде на Министерскиот совет на ОБСЕ, кој кон крајот на месецов ќе се одржи во Скопје, а почната е и процедурата за доаѓање на шефот на руската дипломатија Сергеј Лавров, чија земја подлежи на санкции од ЕУ по војната со Украина.
„Во санкциите се наведува дека за меѓународни организации како што е ОБСЕ е дозволен прелет. Сепак, одлуката е на земјите членки. Затоа нашите соседи ќе треба да одлучат, а и ние за нашиот воздушен простор“, рече синоќа Османи во емисијата „360“, прашан за доаѓањето на шефот на руската дипломатија Лавров.
Во врска со тоа дали е можно доколку дојде Лавров, да не присуствува украинскиот министер за надворешни работи Дмитро Кулеба, шефот на македонската дипломатија и актуелен претседавач со ОБСЕ се надева дека нема да се случи тоа. „Затоа пред две-три недели отидов во Киев, да обезбедам присуство и на Кулеба. Сè уште сме во разговори. Јас мислам дека како што во Виена имаме состанок секој вторник, така треба да биде и во Скопје.
Тој додаде дека, според информациите што ги има, на состанокот во Скопје се очекува да дојдат и министрите за надворешни работи на Канада, Велика Британија, на земји членки на НАТО, ЕУ, како и на Централна Азија. Според Османи, ќе дојде и заменик-министерот на Тајланд, кој ќе биде прв официјален претставник од таа земја што дошол во Македонија од независноста.
На Министерскиот совет на ОБСЕ во Скопје се очекува присуство на 76 делегации, од кои 57 се од земјите членки на ОБСЕ и 11 од партнерските земји од медитеранската и азиската група. Резервирани се пет хотели во кои треба да се сместат делегациите. Самитот ќе почне со неформална вечера, која, како што рече Османи, ќе се одржи на 29 ноември.
Според Османи, подготовките се одвиваат во согласност со планираната динамика и се работи во согласност со т.н. водич на ОБСЕ во кој се утврдени и најситните детали за организирање вакви настани.
Досега, како што посочи Османи, потрошени се три милиони евра во делот на набавките, иако првично биле предвидени пет милиони евра.
Во однос на информациите во јавноста за изборот на компанијата „Евровиа“, која е ангажирана за реконструкцијата на салата „Борис Трајковски“, каде што ќе се одржува Министерскиот совет, и за изборот на рентакар-компанијата, Османи вели дека контроверзиите за јавните набавки се опозициски шпекулации.
За „Евровиа“ вели дека критериум била најниската цена, а изборот го направила комисија што не ја интересира дали компанијата е спонзор на ДУИ или не, додека во однос на изнајмувањето возила за претстојниот Министерски совет, во вкупен износ на рамковната спогодба од речиси еден милион евра, вели дека само една фирма се пријавила на тендерот и оти не знае дали во заднина имало договарање меѓу компаниите.
„Очекувавме дека ќе има четири-пет понуди и, на крајот, ги отворија понудите – излезе една. Не е мое да испитувам дали тие го поделиле пазарот, дали се договараат меѓу себе за да не си конкурираат еден на друг – тоа не е работа на Министерството. Ние отвораме понуди, таа што е најповолна, ја потпишувам“, вели Османи.
Во однос на извештајот на Европската комисија за напредокот на земјава, оцената на шефот на македонската дипломатија е дека вкупниот напредок на Македонија не е загрозен.
